យុវតីម្នាក់ លេបថ្នាំងងុយ ដេកជាច្រើន គ្រាប់ប៉ង សម្លាប់ខ្លួន គ្រាន់តែម្តាយស្តី បន្ទោសពីរឿង មិនជួយធ្វើការផ្ទះ

កណ្តាល៖ ហេតុការណ៍ភ្ញាក់ ផ្អើលមួយ បានកើតឡើងនៅ ភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល កាលពីវេលាម៉ោង ៩និង៣០នាទី ព្រឹកថ្ងៃទី៩ ខែកញ្ញា ឆ្នាំ២០១៣ដោយសារស្រ្តីវ័យចំណាស់ ម្នាក់ បានហៅអ្នកភូមិឲ្យ ជួយសង្រ្គោះស្រីគាត់ ដែលកំពុងសន្លប់ស្តូកស្តឹង ព្រោះតែកូនស្រីគាត់បាន លេបថ្នាំ ងងុយដេកច្រើន គ្រាប់ប៉ងសម្លាប់ខ្លួន តែបានជួយសង្រ្គោះរួចផុតពី សេចក្តីមរណ: ។          

តាមការរៀបរាប់របស់ម្តាយ បានឲ្យដឹងថា នៅយប់ថ្ងៃអាទិត្យ គាត់ស្តីបន្ទោសឲ្យកូនស្រី ឈ្មោះ ស្រីអូន នេះ ពីរឿងមិនចេះជួយ ធ្វើការងារក្នុងផ្ទះ លុះព្រឹកឡើងថ្ងៃចន្ទ ទី៩ កញ្ញានេះ គាត់បានចេញ ទៅធ្វើចំការនៅក្រោយផ្ទះ ជាធម្មតា ស្រាប់តែនៅវេលា ម៉ោងជាង៩ កូនប្រុសគាត់បានរត់ទៅស្រែកហៅគាត់ និងប្រាប់ថា បងស្រី លេបថ្នាំសម្លាប់ខ្លួន ។ ភ្លាមៗនោះ គាត់បានរត់មក ដល់ផ្ទះ ឃើញកូនស្រីគាត់ កំពុងដេកដួលនៅលើដី គាត់ក៏បានស្ទុះស្ទាដឹកយកទៅសង្រ្គោះនៅគ្លីនិកឯកជន នៅមុខផ្សារគគីរ ។

លោក យឹម សុខុម នាយប៉ុស្តិ៍ឃុំភូមិធំ បានឲ្យដឹងថា ជនរងគ្រោះខាងលើឈ្មោះ ស្រីអូន ភេទស្រី អាយុ១៩ឆ្នាំ ជាកម្មករកាត់ដេរ ស្នាក់នៅភូមិឃុំកើតហេតុខាងលើ ជាម្តាយជាស្រ្តីមេម៉ាយ មានកូនប្រុសស្រី៤នាក់ នៅក្នុងបន្ទុក ៕