ភ្នំពេញៈ ប្អូនប្រុសសេដ្ឋីម្នាក់ដែលជាម្ចាស់ធនាគារកម្ពុជាពាណិជ្ជ ត្រូវបានបញ្ជូនទៅសាលាដំបូងរាជធានីភ្នំពេញ កាលពីម្សិលមិញពាក់ព័ន្ធនឹងបទចោទប្រកាន់ករណីបាញ់សម្លាប់បុរស វ័យក្មេងម្នាក់កាលពីសប្តាហ៍មុននៅរាជធានីភ្នំពេញ។
លោក អ៊ុច សុខុន អធិការនគរបាលខណ្ឌចំការមន បានថ្លែងថា លោក ជា រតនៈ ជាប្អូនប្រុសឧកញ៉ា ជា រតនា ម្ចាស់ធនាគារកម្ពុជាពាណិជ្ជ ត្រូវបានចោទប្រកាន់ពីបទបាញ់សម្លាប់បុរសវ័យក្មេងម្នាក់កាល ពីថ្ងៃទី៥ មករា ឆ្នាំ២០១២ នៅវេលាម៉ោង៧ល្ងាច ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ។
លោកបានប្រាប់ភ្នំពេញប៉ុស្តិ៍តាមទូរស័ព្ទពីម្សិលមិញថា៖ «គាត់ត្រូវបានចាប់ខ្លួនដោយនគរបាលកាលពីថ្ងៃទី៥ មករា បន្ទាប់ពីបានបាញ់ជនរងគ្រោះឲ្យស្លាប់នៅមុខផ្ទះគាត់ក្នុង សង្កាត់ទំនប់ទឹក។ គាត់ត្រូវបានបញ្ជូនទៅតុលាការពីបទចោទប្រកាន់នេះ នៅរសៀលម្សិលមិញ»។
ពាក់ព័ន្ធនឹងបទចោទប្រកាន់លើលោក ជា រតនៈ លោក សុខ រឿន ព្រះរាជអាជ្ញារងនៃសាលាដំបូងរាជធានីភ្នំពេញ មិនអាចទាក់ទងសុំការធ្វើអត្ថាធិប្បាយបានទេ កាលពីម្សិលមិញ។
នគរបាលម្នាក់នៅសង្កាត់ទំនប់ទឹក ដែលសុំមិនបញ្ចេញឈ្មោះបានប្រាប់ភ្នំពេញ ប៉ុស្តិ៍ ថា លោក ជា រតនៈ អាយុ៣២ឆ្នាំ គឺជានគរបាលមួយរូប បម្រើការនៅនាយកដ្ឋាននគរបាលអធិការកិច្ចនៃក្រសួងមហាផ្ទៃ។
ពាក់ព័ន្ធករណីបាញ់សម្លាប់នោះ លោកបានរៀបរាប់ថា កាលពីថ្ងៃទី ៥ ខែមករា ឆ្នាំ២០១២ នៅម៉ោងប្រហែល៧ល្ងាច លោក ជា រតនៈ បានបើកឡានឡិចស៊ីសរបស់គាត់ ដើម្បីចូលផ្ទះ នៅសង្កាត់ទំនប់ទឹក ខណ្ឌចំការមន។
លោកបានបន្តថា ៖ «នៅពេលគាត់បើកឡានមកដល់ផ្ទះ គាត់បានឃើញមានយុវជនចំនួនបួននាក់ ជាមួយម៉ូតូពីរគ្រឿងកំពុងចតនិងឈរនៅមុខទ្វារចូលផ្ទះគាត់។ ដើម្បីបណ្តេញពួកគេឲ្យចេញពីផ្ទះ គាត់បានបាញ់កាំភ្លើងមួយគ្រាប់ឡើងលើ»។
លោកបានថ្លែងបន្តទៀតថា បន្ទាប់ពីការបាញ់កាំភ្លើងមួយគ្រាប់នោះ យុវជនទាំងបួននាក់នោះបានរុញម៉ូតូចេញយឺតៗពីកន្លែងចតនោះ ហើយពួកគេហាក់បីដូចជាខឹងជាមួយគាត់ នឹងបានសម្លឹងមុខគាត់។
លោកបានថ្លែងទៀតថា ៖ «គាត់ក៏បានបាញ់កាំភ្លើងចំនួនពីរគ្រាប់ទៀតទៅលើពួកគេ ពីព្រោះគាត់ខឹងពួកគេ... ដោយសារពួកគេមើលមុខគាត់»។
លោកបន្តទៀតថា បន្ទាប់ពីការបាញ់ចុងក្រោយនោះ យុវជនម្នាក់ក្នុងចំណោមពួកគេបួននាក់នោះបានរងរបួសធ្ងន់ធ្ងរ ហើយបានស្លាប់នៅ១៥នាទីក្រោយបន្ទាប់ពីការបាញ់នោះ ខណៈកំពុងគ្រាដោយមិត្តភក្តិយកទៅគ្លីនិក ក្នុងខណ្ឌ នៅជិតនោះ។
លោក ជា រតនៈ មិនអាចទាក់ទង ដើម្បីសុំការធ្វើអត្ថាធិប្បាយបានទេ កាលពីថ្ងៃអង្គារម្សិលមិញ៕
ដកស្រង់ពី Phnom Penh Post
ព័ត៏មានបន្ថែម៖ លោកឧកញ៉ាជា រតនា នឹងប្ដឹងកាសែតភ្នំពេញប៉ុស្តិ៍ពីបទផ្សាយព័ត៌មានមិនពិត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]