ជាទង្វើធម្មតាៗសាមញ្ញ ក៏ជារឿងតូចតាច តែអាចឱ្យដៃគូរបស់អ្នកសប្បាយចិត្ត ញញឹមពេញមួយថ្ងៃបាន

ពាក្យថាស្រឡាញ់ ងាយនឹងនិយាយ តែអ្វីដែលអាចកំណត់បានច្បាស់ថា ក្ដីស្រឡាញ់នោះមានទំហំប៉ុនណា គឺអាស្រ័យលើទង្វើ កាយវិការ ដែលគេបានធ្វើមកលើយើង។
ពេលខ្លះដៃគូរបស់យើង​ គាត់មិនចង់បានទង្វើ ឬកាយវិការណាមួយដែលមើលទៅឱ្យឃើញថាអស្ចារ្យ​​​​​ ដែលត្រូវជូនផ្កា ឬកាដូថ្លៃៗអីនោះទេ គាត់គ្រាន់តែចង់បានទង្វើដែលចេញពីក្ដីស្រឡាញ់ពិតៗ ហើយវាក៏ជាកាយវិការដ៏សាមញ្ញប្រចាំថ្ងៃ តែអាចឱ្យគាត់មានអារម្មណ៍ថា កក់ក្ដៅ និងមានក្ដីសុខបំផុត។

១. តែងតែនិយាយពេកថា Good Night ជារឿងរាល់យប់មុនពេលចូលគេង ហើយនិយាយពាក្យថា Good Morning រាល់ព្រឹក ពេលក្រោកពីគេ។ វាជាភាសាសាមញ្ញ ដែលយើងប្រើប្រចាំថ្ងៃ តែស្ដាប់ហើយមានអារម្មណ៍ថា រីករាយណាស់ ព្រោះយើងមានអ្នកនឹកនាដល់គ្រប់ពេលក្រោកពីគេង និងមុនចូលគេង។
២. តែងតែប្រាប់គ្នា ពីសកម្មភាពសំខាន់ដែលខ្លួនបានធ្វើប្រចាំថ្ងៃ ទង្វើនេះមានន័យថា យើងមានមនុស្សម្នាក់ដែលមិនកុហក ឬលាក់បាំង ហើយទើសទាល់ក្នុងការប្រាប់រឿងផ្ទាល់ខ្លួនគេឱ្យយើងបានដឹង។
៣. ពេលទៅណាមកណាជាមួយគ្នា តែងតែកាន់ដៃដើរទន្ទឹមគ្នា ឬអាចកៀកស្មាគ្នាដើរ មើលទៅអ្នកខ្លះអាចនឹងជ្រេញ តែវាជាកាយវិការដ៏សាមញ្ញបំផុត សម្រាប់គូស្នេហ៍គ្រប់រូបតែប៉ុណ្ណោះ។

៤. និយាយពាក្យសម្ដីសាមញ្ញចំពោះគ្នា មិនបាច់ផ្អែមល្ហែមពេកទេវាអាចទ្រលាន់ គ្រាន់តែពាក្យសាមញ្ញ បែបបងប្អូន ឬមិត្តភក្តិអីបែបហ្នឹង ក៏ស្និទ្ធស្នាលណាស់ទៅហើយ។
៥. ពេលចេញក្រៅទៅណា តែងតែប្រាប់យើងឱ្យដឹង ពេលទៅផ្ទះតែងតែខល ឬផ្ញើសារប្រាប់ថាដល់ផ្ទះហើយ ឬសួរគ្នាថា ដល់ផ្ទះឬនៅ? ពេលជិះតាមផ្លូវប្រយ័ត្នប្រយែងផង ពាក្យនេះស្ដាប់ហើយត្រជាក់ចិត្ត និងមានអារម្មណ៍ថា មានសុវត្ថិភាពជានិច្ច...។

ហើយក៏នៅមានចំណុចមួយចំនួនទៀត ដែលមើលទៅវាជាកាយវិការសាមញ្ញៗ បែបគូស្នេហ៍ដែលសាមញ្ញ មិនមែនបែបលក្ខណៈអភិជន នោះហើយជាសេចក្ដីសុខដ៏ធំធេងសម្រាប់ដៃគូរបស់យើង៕

ខ្មែរឡូតសូមរក្សាសិទ្ធិ