ខេត្តបាត់ដំបង ៖ បុរសជាឪពុកម្នាក់បានបង្ហាញពីចរិតដ៏ឃោរឃៅបំផុត រហូតផ្អើលអ្នកភូមិ ព្រោះតែយកច្រវាក់ដាក់.ក កូនប្រុស អាយុ១៣ឆ្នាំ រួចអូសយកទៅចាក់សោភ្ជាប់ទៅនឹងបង្គោលភ្លើងក្បែរចិញ្ចើមផ្លូវ សាធារណៈឱ្យមហាជនមើល ដោយគ្រាន់តែខឹងហាមកូនមិនស្តាប់រឿងទៅលេងហ្គេម ។ អំពើនេះត្រូវសាក្សីនិយាយថា បានកើតឡើងនៅម៉ោងប្រហែល៤រសៀល ថ្ងៃទី២៧ មីនា នៅភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង ។
មន្ត្រីនគរបាលព្រហ្មទណ្ឌខេត្តលោក គឹម ពន្លក ដែលបានដឹកនាំកម្លាំងចុះអន្តរាគមន៍ក្នុងករណីនេះនិយាយថា ក្រោយពីមានហេតុការណ៍នេះកើតឡើងភ្លាម អ្នកភូមិបានរាយការណ៍ទៅលោកស្នងការរង ជេត វណ្ណនី ទើបលោកបញ្ជាឱ្យកម្លាំងចុះអន្តរាគមន៍ភ្លាមៗ។ នៅពេលសមត្ថកិច្ចចុះទៅដល់ គេឃើញកុមារានោះកំពុងជាប់ច្រវាក់.កដែលចាក់ដោយសោសូឡិច រីឯសោមួយទៀតត្រូវឪពុកចាក់ច្រវាក់ភ្ជាប់ទៅនឹងបង្គោលភ្លើង ។ ទិដ្ឋភាពបែបនេះមើលទៅគួរឱ្យខ្លោចផ្សាក្រៃលែង ខណៈដែលគេអង្គុយឱបបង្គោលភ្លើងជាមួយនឹងច្រវាក់វ័ណ្ឌ.ក និងមានស្នាមរបួសពេញផ្ទៃមុខផង ។
កុមារានេះប្រាប់ថា ខ្លួនគេឈ្មោះ សុខ ខន អាយុ១៣ឆ្នាំ ឪពុកឈ្មោះសុខ ធឿន អាយុជាង៤០ឆ្នាំ និងម្តាយឈ្មោះលី ។ សុខ ខន បាននិយាយទាំងទឹកភ្នែកថា ឪពុកខ្លួនខឹងដោយសារខ្លួនទៅលេងហ្គេមនៅម្តុំផ្សារថ្មី(ផ្សារ ១៣មករា)។ពេលកំពុងលេងបានប្រហែលជិតកន្លះម៉ោងឪពុកខ្លួនបានទៅ តាមរួចនាំមកដល់ផ្ទះក៏វាយធ្វើទារុណកម្មមកលើខ្លួនគ្មានត្រា ប្រណី ។ បន្ទាប់មកគាត់បានយកច្រវាក់មកទាក់.កចាក់សោសូឡិចយ៉ាងតឹង រួចអូសខ្លួនទៅចាក់សោមួយទៀតភ្ជាប់នឹងបង្គោលភ្លើងក្បែរផ្លូវ កណ្តាលវាលឱ្យអ្នកភូមិមើល ហើយគាត់ជិះម៉ូតូគេចបាត់ លុះមួយន្ទុះទើបមានប៉ូលិសចុះទៅជួយសង្គ្រោះ ។
សាក្សីដែលឃើញព្រឹត្តិការណ៍នេះ បានរិះគន់ថា បុរសជាឪពុកហាក់ដូចជាប្រើចរិតឃោរឃៅពេកហើយ គ្រាន់តែរឿងប៉ុណ្ណឹងសោះបែរជាធ្វើទារុណកម្មកូនខ្លួនឯងធ្ងន់ធ្ងរ ដល់ម្លុឹង ។ សាក្សីបញ្ជាក់ទៀតថា មិនតែប៉ុណ្ណោះបុរសជាឪពុកបានវាយកូនបណ្តើរ ហើយអូសយកមកចាក់សោភ្ជាប់នឹងបង្គោលភ្លើង ដែលមើលទៅគួរឱ្យខ្លោចផ្សា ហើយក៏មិនគួរឱ្យកើតមានដល់កុមារដទៃទៀតដែរ ។
លោក ជេត វណ្ណនី ស្នងការរងនគរបាលខេត្តមានប្រសាសន៍ថា ក្រោយពីលោកទទួលដំណឹងនេះភ្លាមបញ្ជាទៅកម្លាំងបង្ក្រាបឱ្យចុះ ទៅដល់កន្លែងកើតហេតុភ្លាមៗដែរ ហើយបានសង្គ្រោះកុមារានោះចេញពីច្រវាក់ ប៉ុន្តែឪពុកក្មេងនេះបានគេចខ្លួនបានទៅហើយមុនពេលសមត្ថកិច្ចចុះ ទៅដល់ ។ លោកបញ្ជាក់ថា នេះជាអំពើឃោរឃៅណាស់ ដែលបុរសជាឪពុកធ្វើបែបនេះទៅលើកូន ។ លោកស្នងការរងបន្ថែមថា ក្នុងករណីនេះ នឹងអាចត្រូវចាត់វិធានការតាម ផ្លូវច្បាប់ បើទោះជាជនបង្ក និងជនរងគ្រោះ ជាឪពុក និងកូនក្តី ព្រោះជាទង្វើព្រៃផ្សៃបំផុតដែលមិនគួរឱ្យកើតមានឡើយ ។
តាមព័ត៌មានមិនផ្លូវការឱ្យដឹងថា បុរសជាឪពុកជាអ្នករត់ម៉ូតូឌុប ឯប្រពន្ធមិនដឹងថា រកស៊ីអ្វីនោះទេ ព្រោះពេលកើតហេតុបែបនេះផ្ទះបិទទ្វារ ។ ក្មេងប្រុសនេះមានបងប្អូន៣នាក់ និងជាកូនទី២ ។ គ្រួសារនេះត្រូវបានប៉ូលិសមូលដ្ឋានប្រាប់ថា ជាអ្នកចំណាកស្រុកមិនរស់នៅក្នុងមូលដ្ឋាននេះជាអចិន្ត្រៃយ៍ទេ ៕
Bopha
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]