កុំភ្លេចគាំទ្រ! កម្ពុជា ប៉ះមីយ៉ាន់ម៉ា ដណ្ដើមចំណាត់ថ្នាក់លេខ៣ នៅស៊ីហ្គេម ម៉ោង៣ រសៀលនេះ

ហ្វីលីពីន៖ ក្រុមបាល់ទាត់ជម្រើសជាតិអាយុក្រោម២២ឆ្នាំកម្ពុជា នឹងត្រូវបំពេញភារកិច្ចចុងក្រោយរបស់ខ្លួន ក្នុងព្រឹត្តិការណ៍កីឡាស៊ីហ្គេមលើកទី៣០ នៅប្រទេសហ្វីលីពីន ដោយត្រូវប្រកួតដណ្ដើមចំណាត់ថ្នាក់លេខ៣ជាមួយ មីយ៉ាន់ម៉ា។

មុនមកជួបគ្នានៅក្នុងការប្រកួតដណ្ដើមចំណាត់ថ្នាក់លេខ៣ នៅវគ្គពាក់កណ្ដាលផ្ដាច់ព្រ័ត្រ កម្ពុជា បានប្រកួតចាញ់ជើងខ្លាំងវៀតណាម ដោយលទ្ធផល៤ទល់នឹង០ ខណៈក្រុមលេខ១ពូល A មីយ៉ាន់ម៉ា ប្រកួតចាញ់ ឥណ្ឌូនេស៊ី ៤-២ នៅក្នុងម៉ោងបន្ថែម ១៥នាទីពីរដង។

កម្ពុជា និងមីយ៉ាន់ម៉ាធ្លាប់បានប៉ះគ្នាម្ដងរួចមកហើយនៅក្នុងការប្រកួតសន្សំពិន្ទុក្នុងពូល A ដោយពេលនោះ មីយ៉ាន់ម៉ា បានយកឈ្នះកម្ពុជា ២ទល់នឹង១។

គួរឲ្យដឹងដែរថា ការប្រកួតដណ្ដើមចំណាត់ថ្នាក់លេខ៣រវាង មីយ៉ាន់ម៉ា និងកម្ពុជា នឹងធ្វើឡើងនៅថ្ងៃនេះ វេលាម៉ោង ៣រសៀល នៅកីឡដ្ឋាន Rizal Memorial Stadium។ ខណៈការប្រកួតវគ្គផ្ដាច់ព្រ័ត្រដណ្ដើមមេដាយមាសរវាងវៀតណាម និងឥណ្ឌូនេស៊ី នឹងធ្វើឡើងនៅម៉ោង ៧យប់៕

រូបភាព៖ សហព័ន្ធកីឡាបាល់ទាត់កម្ពុជា