អង់គ្លេស៖ ក្លិបកាំភ្លើងធំ Arsenal ត្រូវបានគេរាយការណ៍ថាបានដាក់គោលដៅចង់បានខ្សែការពារកំពុងឡើងជើងរបស់ក្លិបបិសាចក្រហម Mancester United កីឡាករ Chris Smalling។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សSmalling បានចាកចេញពីក្រុម Man Utd កាលពីរដូវក្តៅកន្លងទៅ បន្ទាប់ពីការមកដល់របស់ កីឡាករ Harry Maguire ដោយបានទៅចូលរួមជាមួយក្រុម Roma ក្នុងលក្ខខណ្ឌខ្ចីជើងរយៈពេលមួយរដូវកាល។
កីឡាករវ័យ ៣០ ឆ្នាំបានបង្ហាញទម្រង់លេងយ៉ាងលេចធ្លោ អំឡុងពេលពីរបីខែដំបូងរបស់គាត់នៅក្នុងប្រទេសអ៊ីតាលី ហើយបច្ចុប្បន្នក្លិបនៅក្របខណ្ឌ Serie A មួយនេះមានបំណងចង់ទិញយករូបគេផ្ដាច់តែម្ដងពី Man Utd ។
យ៉ាងណាមិញយោងតាមកាសែត Sunday Mirror បានឲ្យដឹងថា ក្លិប Arsenal បានចូលរួមប្រជែងជាមួយនឹងក្លិប Roma ក្នុងការដណ្ដើមយកកីឡាកររូបនេះមកពង្រឹងតំបន់ការពារក្នុងក្រុម ដោយក្លិបកាំភ្លើងធំបានបញ្ជូនភ្នាក់ងាររបស់ខ្លួនទៅកាន់ប្រទេសអ៊ីតាលី ដើម្បីតាមដានពីសមត្ថភាពនិងទម្រង់លេងរបស់ Smalling។
ប្រភពដដែលបានបន្ថែមទៀតថា ក្លិប Everton និង Leicester City ក៏ចាប់អារម្មណ៍ចង់បាន Smalling ដែរ ខណៈ United ទាមទារតម្លៃ១៨លានផោន (ឬប្រហែល ២៣,៦លានដុល្លារអាមេរិក) សម្រាប់ខ្សែការពារសញ្ជាតិអង់គ្លេសរូបនេះ។
គួរបញ្ជាក់ផងដែរថា ក្នុងនាមជាខ្សែការពារកណ្ដាល កីឡាករ Chris Smalling បានជាប់ក្នុងជម្រើស១១នាក់ដំបូងរបស់ក្រុម Roma បានចំនួន១៤ ប្រកួតក្នុងរដូវកាលនេះ ដោយស៊ុតបញ្ចូលទីបាន២គ្រាប់និងបញ្ជូនបាល់ឲ្យមិត្តរួមក្រុមសម្រេចទីបាន១ដង៕
ប្រភព៖ metro