ហ្វីលីពីន៖ គិតមកត្រឹមព្រឹកថ្ងៃទី០៩ ខែធ្នូ ម៉ោង ៨ព្រឹក (ម៉ោងនៅក្នុងប្រទេសកម្ពុជា) កម្ពុជាកំពុងតែឈរនៅចំណាត់ថ្នាក់លេខ៨ នៅក្នុងតារាងមេដាយបណ្ដោះអាសន្នព្រឹត្តិការណ៍ការប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកម្ពុជា បានឈ្នះមេដាយសរុប ៣០គ្រឿង ក្នុងនោះមានមាស៣ ប្រាក់៦ និងសំរឹទ្ធ២១។ ខណៈម្ចាស់ផ្ទះហ្វីលីពីន ឈ្នះបានមេដាយសរុប ២៨៧ មានមាស ១១២គ្រឿង កំពុងឈរនៅលេខ១។ ចំណែកឯទីម័រខាងកើត ដែលកំពុងឈរនៅចំណាត់ថ្នាក់ក្រោមគេលេខ១១ រកបានមេដាយសំរឹទ្ធ ១គ្រឿងនឹងគេដែរហើយ។
បើធៀបទៅនឹងពេលវេលាដូចគ្នាកាលពីម្សិលមិញ កម្ពុជា បានកើនមេដាយ ១គ្រឿងទៀតដែលរកបានដោយកីឡាការនី ស៊ន សៀវម៉ី ក្នុងប្រភេទវិញ្ញាសាតេក្វាន់ដូនារី ៧៣គីឡូក្រាម ក្រោយយកឈ្នះកីឡាការនីម្ចាស់ផ្ទះហ្វីលីពីននៅវគ្គផ្ដាច់ព្រ័ត្រ។
គួរឲ្យដឹងដែរថា កម្ពុជានៅសល់ប្រភេទវិញ្ញាសាមួយចំនួនទៀតដែលរំពឹងថានឹងអាចឈ្នះមេដាយជូនជាតិ ដូចជា ជីជីតស៊ូ និងចាំបាប់ ខណៈការប្រកួតព្រឹត្តិការណ៍កីឡា ២ឆ្នាំម្ដងមួយនេះគ្រោងនឹងបញ្ចប់ទៅនៅថ្ងៃទី១១ ខែធ្នូខាងមុខ៕