ទោះបី Ronaldo ស៊ុតចូល ប៉ុន្តែ Juventus ចាញ់លើកដំបូងនៅរដូវកាលនេះកាលពីយប់មិញ (មានវីដេអូ)

អ៊ីតាលី៖ សេះបង្កង់ Juventus បានស្គាល់ពាក្យថាចាញ់លើកដំបូងនៅរដូវកាលនេះ ក្នុងក្របខណ្ឌ Serie A ក្រោយប្រកួតចាញ់ម្ចាស់ផ្ទះ Lazio ដោយលទ្ធផល ៣ទល់នឹង១ កាលពីយប់មិញ ក្នុងសប្ដាហ៍ទី១៥។

Ronaldo ជាអ្នកស៊ុតបើកការនាំមុខមុនឲ្យ Juventus បន្ទាប់ពីទទួលបាល់បញ្ជូនពីមិត្តរួមក្រុម Bentancur នៅនាទីទី២៥។ ការប្រកួតអូសបន្លាយជិតចប់វគ្គទី១ទៅហើយ ពោលគឺនៅណាំទីទី៤៥ Lazio បានវាយបកតាមស្មើវិញដោយការតែតរបស់កីឡាករ Luiz Felipe។ ការប្រកួតចប់វគ្គទី១ ក្រុមទាំងពីរស្មើគ្នា ១-១។

ការប្រកួតចូលវគ្គទី២នាទីទី៦៩ Juventus បានទទួលកាតក្រហមមួយក្រោយកីឡាករ Juan Cuadrado បានបង្កកំហុសទៅលើកីឡាកររបស់ Lazio។ ក្រោយសល់សមាជិកត្រឹម១០នាក់ Juventus ត្រូវ Lazio បំប៉ោងសំណាញ់ទី២គ្រាប់បន្ថែមទៀតនៅនាទីទី៧៤ ដោយកីឡាករ Milinkovic-Savic និងនៅនាទីទី៩០ ដោយកីឡាករ Felipe Caicedo។ ចប់ការប្រកួត៩០នាទី Lazio យកឈ្នះ Juventus ៣-១។

បរាជ័យយប់មិញ គឺជាបរាជ័យលើកដំបូងហើយរបស់ជើងឯករដូវកាលមុន នៅរដូវកាលនេះក្នុងក្របខណ្ឌ Serie A។ គិតត្រឹម១៥ប្រកួតក្រុមរបស់លោក Sarri ឈរនៅចំណាត់ថ្នាក់លេខ២ មាន៣៦ពិន្ទុ ឈ្នះ១១ ស្មើ៣ និងចាញ់១ តាមពីក្រោយក្រុមលេខ១ Inter Milan ដែលមាន ៣៨ពិន្ទុ៕

ចង់ឃើញថាការចាញ់លើកទី១របស់ Juventus នៅរដូវកាលនេះយ៉ាងណានោះ សូមទស្សនាវីដេអូ Highlight នៅខាងក្រោម៖