ក្លិបយក្សពីរ ចាប់អារម្មណ៍ចង់បានខ្សែបម្រើប្រយុទ្ធឆ្នើមម្នាក់របស់ Real Madrid

អឺរ៉ុប៖ បើតាមសេចក្ដីរាយការណ៍បានឲ្យដឹងថា ក្លិបយក្សអ៊ីតាលី Napoli បានចាប់អារម្មណ៍ចូលខ្លួនមកប្រជែង Arsenal ក្នុងការនាំយកកីឡាករ James Rodriguez ពី Real Madrid នៅទីផ្សារដោះដូរកីឡាកររដូវក្ដៅលើកក្រោយ។

James ត្រូវបានគេមើលឃើញថាអាចនឹងចាកចេញពីកីឡដ្ឋាន Santiago Bernabeu ក្រោយធ្វើមិនបានល្អឲ្យលោក Zinedine Zidane ដោយអាចរកបានត្រឹម ១គ្រាប់ប៉ុណ្ណោះនៅក្នុងរដូវកាលនេះ។ ហើយក៏មានដំណឹងលេចឭមកថាកាំភ្លើងធំ Arsenal បានដាក់ការចង់បានមកលើកីឡាករជម្រើសជាតិកូឡាំប៊ីរូបនេះនៅទីផ្សារខែមករាខាងមុខ។

យ៉ាងណាមិញ បើតាមប្រភពពីក្នុងប្រទេសអេស្ប៉ាញ ក្លិបនៅអ៊ីតាលី Napoli បានត្រៀមខ្លួនរួចរាល់ក្នុងការប្រជែងជាមួយ Arsenal ក្នុងការនាំយក James មកលេងនៅក្របខណ្ឌ Serie A។

គួរឲ្យដឹងដែរថា James Rodriguez មានទំនាក់ទំនងយ៉ាងល្អជាមួយអ្នកចាត់ការទូទៅ Napoli បច្ចុប្បន្នលោក Carlos Ancelotti ដោយខ្សែបម្រើប្រយុទ្ធ James ធ្លាប់លេងក្រោមការដឹកនាំរបស់អ្នកចាត់ការទូទៅសញ្ជាតិអ៊ីតាលីនៅ Real Madrid និង Bayern Munich។

ជាមួយគ្នានេះ ក្លិបយក្សអេស្ប៉ាញ Real Madrid អាចនឹងភ្លើងខៀវឲ្យ James ផ្លាស់ទៅ Arsenal បើសិនជាក្លិបមានមូលដ្ឋាននៅទីក្រុងឡុងដ៍អនុញ្ញាតយល់ព្រមលក់ Pierre-Emerick Aubameyang ត្រឡប់មកវិញ៕

ប្រភព៖ SportsMole