Man UTD មានទំនុកចិត្តថានឹងផ្ដួល Liverpool ក្នុងការទិញកីឡាករជម្រើសជាតិអង់គ្លេសម្នាក់

អង់គ្លេស៖ ក្លិបបិសាចក្រហម Manchester United មានទំនុកចិត្តថានឹងយកឈ្នះ Liverpool ក្នុងការនាំយកខ្សែប្រយុទ្ធស្លាបរបស់ Borussia Dortmund កីឡាករ Jadon Sancho។

ក្រោយចាកចេញពី Manchester City កាលពីឆ្នាំ២០១៧ កីឡាករវ័យ ១៩ឆ្នាំ Jadon Sancho បានវិវត្តន៍ខ្លួនក្លាយជាកីឡាករដែលលេចធ្លោមួយរូបនៅក្របខណ្ឌ Bundesliga និងជាតួអង្គសំខាន់របស់លោក Gareth Southgate ក្នុងក្រុមជម្រើសជាតិអង់គ្លេស។

Man UTD បានចាប់អារម្មណ៍ចង់បាន Sancho តាំងពីទីផ្សារដោះដូរកីឡាកររដូវក្ដៅ ប៉ុន្តែមិនអាចឈានដល់ការផ្ទេរ ដោយការចរចាបរាជ័យជាមួយ Dortmund។ បើទោះបីជាក្រុមរបស់លោក Ole Gunnar Solskjaer មិនអាចសន្យាបានថានឹងអាចមានកៅអីលេងពានរង្វាន់​ Champions League នៅរដូវកាលក្រោយ ប៉ុន្តែបិសាចក្រហមមានជំនឿចិត្តថានឹងអាចនាំយក Sancho ត្រឡប់មកលេងនៅទីក្រុង Manchester វិញដោយបានប្រកាសជាសាធារណៈថាគេគឺជាគោលដៅទីមួយដែលក្លិបចង់បាន។

គួរឲ្យដឹងដែរថា ក្រោពី Man UTD និង Liverpool នៅមានបណ្ដាក្លិបធំៗជាច្រើននៅអឺរ៉ុបដាក់ការចាប់អារម្មណ៍មកលើជម្រើសជាតិអង់គ្លេសវ័យក្មេងរូបនេះ រួមមាន Manchester City, Real Madrid, Barcelona និង Paris Saint-Germain៕

ប្រភព៖ SportsMole