ស្ងាត់ៗ! Dortmund ចង់ឆ្មក់យកគោលដៅរបស់ Man Utd ១រូបពី Juventus

អាល្លឺម៉ង់៖ យោងតាមប្រភពព័ត៌មានរបស់គេហទំព័រ Bild បានអោយដឹងថាក្លិប Borussia Dortmund កំពុងសម្លឹងមើលឱកាសក្នុងការចុះកុងត្រាយកខ្សែបម្រើសញ្ជាតិអាល្លឺម៉ង់របស់ក្លិបសេះបង្កង់ Juventus កីឡាករ Emre Can នៅអំឡុងពេលទីផ្សារដោះដូរកីឡាករខែមករាខាងមុខនេះ។

តាមរយៈប្រភពដដែលបានបន្តអោយដឹងទៀតថា ក្លិប Borussia Dortmund អាចនឹងបំពេញតាមការស្នើសុំរបស់ក្លិប Juventus ក្នុងការទាមទារតម្លៃ២០អឺរ៉ូ (ឬប្រហែល២២លានដុល្លារអាមេរិក) សម្រាប់ខ្សែបម្រើវ័យ២៥ឆ្នាំរូបនេះ ប៉ុន្តែការទាមទារប្រាក់ឈ្នួល ១២លានអឺរ៉ូ (ឬប្រហែល១៣,២លានដុល្លារអាមេរិក) ក្នុង១ឆ្នាំរបស់កីឡាករ Emre Can អាចជាឧបសគ្គក្នុងការចរចានេះ។

យ៉ាងណាមិញ កីឡាករ Emre Can បានបញ្ជាក់យ៉ាងច្បាស់ថា ​គាត់មិនសប្បាយចិត្តនឹងស្ថានភាពបច្ចុប្បន្នរបស់គាត់ជាមួយនឹងក្លិបនោះទេ ដូច្នេះគាត់អាចនឹងសុខចិត្តបន្ធូបន្ថយប្រាក់ខែរបស់គាត់ដើម្បីដើរចេញពីក្លិបយក្សប្រចាំលីគកំពូលអ៊ីតាលីមួយនេះ។

ខ្សែបម្រើសញ្ជាតិអាល្លឺម៉ង់រូបនេះមិនសូវមានឱកាសបង្ហាញខ្លួនឲ្យ Juventus នោះទេ ក្រោយការមកដល់របស់លោក Maurizio Sarri ដោយក្នុងរដូវកាលនេះរូបគេចូលលេងបានត្រឹមតែ៤ប្រកួតប៉ុណ្ណោះ ហើយមិនដែលជាប់ឈ្មោះទៅលេងក្នុងក្របខណ្ឌ Champions League ជាមួយក្រុមនោះទេ។

គួររម្លឹកផងដែរថា ក្លិបសេះបង្កង់ Juventus បាននាំយកកីឡាករ Emre Can ពីក្លិបហង្សក្រហម Liverpool ដោយគ្មានតម្លៃខ្លួនកាលពីឆ្នាំ២០១៨ ដោយបង្ហាញខ្លួនសរុបបាន៤១លើកស៊ុតបញ្ចូលទីបាន៤គ្រាប់៕

ប្រភព៖ bulinews