Juventus ដាក់កីឡាករ២រូបឲ្យ Man UTD ពិចារណា ដើម្បីស្រវ៉ាយក Pogba ត្រឡប់មកវិញ

អ៊ីតាលី៖ ក្លិបសេះបង្កង់ Juventus បានរៀបចំសំណើដោយដាក់កីឡាកររបស់ខ្លួនដល់ទៅ២រូប ដើម្បីនាំយកខ្សែបម្រើ Paul Pogba ពី Manchester United ត្រឡប់មកវិញ។

Juventus និង Real Madrid ត្រូវបានគេដឹងថាចាប់អារម្មណ៍ចង់បានខ្សែបម្រើជម្រើសជាតិបារាំង Paul Pogba តាំងពីទីផ្សារដោះដូរកីឡាកររដូវក្ដៅ ខណៈទីផ្សារខែមករាជិតចូលមកដល់ Pogba ត្រូវបានគេដឹងថាអាចនឹងចាកចេញពីកីឡដ្ឋាន Old Trafford។

យ៉ាងណាមិញ ក្លិបបិសាចក្រហម Manchester United ធ្លាប់បានបញ្ជាក់ថាខ្សែបម្រើវ័យ ២៦ឆ្នាំរូបនេះមិនមែនសម្រាប់លក់នោះទេ ខណៈកិច្ចសន្យារវាងក្លិបនិងកីឡាករនៅមានសុពលភាពរយៈពេល ២ឆ្នាំកន្លះទៀត។

បើតាមកាសែតអ៊ីតាលី Tuttosport បានចុះផ្សាយថាជើងឯកក្របខណ្ឌ Serie A ក្លិប Juventus បានដាក់សំណើដោយបូកបញ្ចូលកីឡាករ២រូបគឺ Emre Can និង Mario Mandzukic ទៅកាន់ក្លិបមានមូលដ្ឋាននៅទីក្រុង Manchester ដើម្បីចរចានាំយក Pogba ត្រឡប់មកលេងនៅទឹកដីអ៊ីតាលី។

គួរឲ្យដឹងដែរថា ក្រោយការចូលមកដឹកនាំរបស់លោក Maurizio Sarri នៅ Juventus កីឡាករទាំងពីររូបខាងលើមិនសូវជាមានឱកាសក្នុងការបង្ហាញខ្លួននៅលើទីលាននោះទេ ខណៈ Mandzukic ក៏មានព័ត៌មានលេចឭមកថាមានភាគរយខ្ពស់ក្នុងការផ្លាស់ទៅ Man UTD ផងដែរ៕

ប្រភព៖ SportsMole