អេស្ប៉ាញ៖ ក្លិប Real Madrid ត្រូវបានគេរាយការណ៍ថា បានដាក់ការចាប់អារម្មណ៍ទៅលើខ្សែបម្រើស្លាបវ័យក្មេងរបស់ក្លិបតោខៀវ Chelsea កីឡាករ Callum Hudson-Odoi។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែបម្រើស្លាបវ័យ១៩ឆ្នាំរូបនេះ ជាកីឡាករវ័យក្មេងដ៏មានទេពកោសល្យមួយរូប ហើយបានបង្ហាញទម្រង់លេងយ៉ាងលេចធ្លោក្នុងជម្រើសជាតិអង់គ្លេស ក៏ដូចជាក្លិបតោខៀវ Chelsea។
ក្នុងរដូវកាលថ្មីនេះរូបគេបង្ហាញខ្លួនបាន១១ប្រកួត ស៊ុតបញ្ចូលទីបាន១គ្រាប់ និងបញ្ជូនបាល់អោយមិត្តរួមក្រុមបញ្ចប់ទីបានចំនួន៤ដង អោយក្រុម Chelsea ចាប់តាំងពីត្រលប់ពីរបួសវិញ។
យោងតាមកាសែត El Desmarque របស់ប្រទេសអេស្ប៉ាញបានអោយដឹងថា ក្លិប Real Madrid បានដាក់បញ្ចូលកីឡាករ Hudson-Odoi ក្នុងបញ្ជីកីឡាករដែលពួកគេចង់បានក្នុងទីផ្សារដោះដូរកីឡាករ ហើយបើយោងតាមគេវាយតម្លៃរបស់គេហទំព័រ Transfermarkt បានអោយដឹងថាតម្លៃខ្លួនរបស់រូបគេបច្ចុប្បន្នមានតម្លៃ៣៥លានអឺរ៉ូ (ឬប្រហែល ៣៨លានដុល្លារអាមេរិក)។
គួររម្លឹកផងដែរថា កីឡាករ Callum Hudson-Odoi ជាយុវជនថ្នាលរបស់ក្រុមតោខៀវ Chelsea ហើយបានតម្លើងអោយមកលេងក្នុងឈុតធំ កាលពីដើមឆ្នាំ២០១៩ ដោយបង្ហាញខ្លួនបាន៣៩ប្រកួត ស៊ុតបញ្ចូលទីបាន៦គ្រាប់ និងបញ្ជូនបាល់អោយមិត្តរួមក្រុមសម្រេចទីបានចំនួន៩ដង គិតរាល់កម្មវិធីទាំងអស់៕
ប្រភព៖ Caughtoffside