រាជធានីភ្នំពេញ ៖ ប្រិយមិត្តជាច្រើនដែលជាអ្នកធ្លាប់គាំទ្រការសម្តែងរបស់អ្នកនាង ម៉េង វិមានរតនា ពិតជានៅចងចាំ ជាពិសេសស្នាដៃសិល្បៈកាលនៅប្រឡូកជាង១០ឆ្នាំមុន។ ពេលនេះអ្នកនាងបានបញ្ចប់អាជីពដែលធ្លាប់ស្រឡាញ់ ក្រោយជួបប្រសព្វជាមួយស្វាមីដែលមានឋានៈធំម្នាក់យ៉ាងមានសុភមង្គល។ ជាពិសេសនៅសល់តែប៉ុន្មានថ្ងៃខាងមុខទៀត អ្នកនាង នឹងរៀបចំពិធីមង្គលការកូនស្រីដ៏ស្រស់ម្នាក់ ក្រោមការពេញចិត្តរវាងចាស់ទុំសងខាងក្រោមពាក្យពេចជ៍ជូនពរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកនាង ម៉េង វិមានរតនា ដែលនៅក្នុងសង្គមសិល្បៈ និងមហាជនមួយចំនួនសុទ្ធតែត្រូវបានដឹងថា បានក្លាយជាជំទាវយូរឆ្នាំមកហើយ ដែលស្វាមីរបស់អ្នកនាងមានងារជាឯកឧត្តម។ អ្នកនាងដ្បិតតែឃ្លាតពីសិល្បៈ តែនៅដិតដាមដោយការគាំទ្រគ្រប់ទម្រង់សិល្បៈដែលកើតមាននាពេលបច្ចុប្បន្ន។
បើក្រឡេកមើលទៅលើផ្នែករូបសម្ជស្សវិញ អ្នកនាង ម៉េង វិមានរតនា នៅតែមានភាពស្រស់សោភាបែបមនុស្សវ័យកណ្តាល មុខស្រទន់ញញឹមស្រស់ ហើយការតុបតែយកាយសុភាពសមជាអ្នកសិល្បៈជើងចាស់។
យ៉ាងណាមិញ អ្នកនាងកំពុងតែរីករាយចិត្តយ៉ាងខ្លាំងជាមួយស្វាមី ព្រោះកូនស្រីដ៏ស្អាតមុខដូចកូនក្រមុំជ័រ ដែលអ្នកនាងឃុំគ្រងបីបាច់ប្រកបដោយព្រហ្មវិហារធម៌ មានមែកធាងដល់គូចូលសំពះផ្ទឹម។ នេះជាបំណងរបស់មាតាបិតា គ្រប់រូបរមែងចង់បានកូនស្ងួនមានចំណងផ្កាស្លាស្របតាមច្បាប់ប្រពៃណី។
យោងតាមលិខិតមង្គលការកូនស្រីរបស់អ្នកនាងម៉េង វិមានរតនា រៀបការនៅថ្ងៃព្រហស្បត្តិ៍ ទី២១ វិច្ឆិកា ឆ្នាំ២០១៩ នៅភូមិ ព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ គេនៅមិនទាន់ដឹងថា អ្នកនាងគ្រោងអញ្ជើញសិល្បករប៉ុន្មាននាក់ចូលរួម តែទំនងមានតែសិល្បៈជើងចាស់ជិតដិតខ្លះប៉ុណ្ណោះ ។
គួររំលឹកថា អ្នកនាង ម៉េង វិមានរតនា ក៏ជាប្អូនស្រីបង្កើតរបស់ អ្នកនាង ម៉េង កែវពេជ្ជតា ម្នាក់ផងដែរ។ ម៉េង វិមានរតនា ក៏មានសំឡេងច្រៀងពីរោះរណ្តំ ប៉ុន្តែដោយសារមានរូបសម្បត្តិស្រស់សោភា អ្នកនាងត្រូវបានគេហៅឱ្យសម្តែងតាមបទចម្រៀងកាយវិការខារ៉ាអូខេច្រើនបទណាស់ កាលពីឆ្នាំ១៩៩៩ ដល់២០០០ជាង។ ចម្រៀងខារ៉ាអូខេ ពេលនោះនៅផលិតកម្មហង្សមាស និងរស្មីហង្សមាស ធ្វើឲ្យទស្សនិកជនចាប់ផ្តើមស្គាល់៕
ប្រភព៖ កោះសន្តិភាព