អង់គ្លេស៖ អ្នកចាំទីដៃទីពីររបស់ក្លិបតោខៀវ Chelsea កីឡាករ Willy Caballero បានបង្ហើបថាគាត់អាចនឹងវិលត្រលប់ទៅលេងក្លិបណាមួយនៅលីគកំពូលប្រទេសអេស្ប៉ាញវិញប្រសិនបើក្លិបមិនបន្តកុងត្រាថ្មីអោយលោកនៅរដូវកាលក្រោយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកចាំទីសញ្ជាតិអាហ្សង់ទីនរូបនេះបង្ហាញខ្លួនអោយក្រុម Chelsea បានចំនួន២៤ប្រកួតបន្ទាប់ពីរូបគេផ្ទេរចេញពីក្លិប Manchester City ដោយគ្មានតម្លៃខ្លួនកាលពីឆ្នាំ២០១៧។
ចំណែកឯក្នុងរដូវកាល ២០១៩/២០ នេះរូបគេបង្ហាញខ្លួនបាន២ប្រកួតប៉ុណ្ណោះអោយក្រុម Chelsea ពោលគឺប្រកួតក្នុងព្រឹត្តិការណ៍ EFL Cup ប៉ក្រុម Grimsby Town និងប្រកួតប៉ះក្រុម Manchester United។
ថ្លែងនៅក្នុងបទសម្ភាសន៍ជាមួយកាសែត AS របស់ប្រទេសអេស្ប៉ាញ អតីតកីឡាករក្លិប Malaga រូបនេះបាននិយាយពីគម្រោងវិលត្រលប់ទៅកាន់លីគ La Liga ថា៖
"កុងត្រារបស់ខ្ញុំជាមួយនឹងក្លិបនឹងផុតកំណត់នាពេលបញ្ចប់រដូវកាលនេះ ហើយយើងនឹងទន្ទឹងរង់ចាំថាមើលនឹងមានអ្វីកើតឡើងនាពេលអនាគត។ខ្ញុំមិនវិលត្រលប់ទៅប្រទេសអាហ្សង់ទីនវិញនោះទេ ព្រោះខ្ញុំចង់លេងនៅតំបន់អឺរ៉ុប។"
កីឡាករ Willy Caballero បន្តទៀតថា៖
"ខ្ញុំចង់ត្រលប់ទៅកាន់ទឹកដីអេស្ប៉ាញវិញ អាចនឹងក្លិប Elche ឬ Malaga។ ប៉ុន្តែឥលូវនេះខ្ញុំជាកីឡាកររបស់ Chelsea ហើយរង់ចាំមើលថាតើនឹងមានអ្វីកើតឡើងនៅខែមិថុនាឆ្នាំក្រោយ៕"
ប្រភព៖ The Sun
Bong I.T