លោក Unai Emery ចាប់ចិត្តទៅលើខ្សែបម្រើវ័យក្មេងក្នុងលីគអ៊ីតាលី Serie A ១រូបជាបេក្ខភាពដែលអាចមកជំនួសកន្លែងរបស់កីឡាករ Xhaka

អង់គ្លេស៖ ក្លិបកាំភ្លើងធំ Arsenal ត្រូវបានគេរាយការណ៍ថាបានចាប់អារម្មណ៍ទៅលើខ្សែបម្រើវ័យ១៩ឆ្នាំរបស់ក្លិប Atalanta កីឡាករ Dejan Kulusevski ក្នុងគោលបំណងចង់បានកីឡាកររូបនេះ មកជំនួសដំណែងកីឡាករ Granit Xhaka។

ខ្សែបម្រើសញ្ជាតិស៊ុយអែតរូបនេះត្រូវបានក្លិប Atalanta ដាក់អោយក្រុម Parma ខ្ចីជើងក្នុងរដូវកាលនេះ ដោយបានបង្ហាញទម្រង់លេងយ៉ាងលេចធ្លោ ក្នុងចំណោម១១ប្រកួតកន្លងទៅនេះរូបគេស៊ុតបញ្ចូលទីបាន២គ្រាប់និងបញ្ជូនបាល់អោយមិត្តរួមក្រុមបញ្ចប់ទីបានចំនួន៥ដង។

យោងតាមគេហទំព័រ Tuttomercatoweb បានអោយដឹងថាទម្រង់លេងរបស់កីឡាករ Dejan Kulusevski បានទាក់ទាញចំណាប់អារម្មណ៍ក្រុមកាំភ្លើងធំ Arsenal យ៉ាងខ្លាំង ដោយលោក Unai Emery ចង់បានកីឡាកររូបនេះមកជំនួសកន្លែងកីឡាករ Granit Xhaka។

តាមរយៈប្រភពដដែលបានបន្តអោយដឹងទៀតថាមិនមែនមានតែក្លិប ​Arsenal នោះទេដែលតាមចែចូវយកកីឡាករ Dejan Kulusevski ក្នុងនោះក្លិប Wolves ក៏ចាប់អារម្មណ៍ចង់បានខ្សែបម្រើវ័យក្មេងរូបនេះផងដែរ។

គួររម្លឹកផងដែរថាកីឡាករ Dejan Kulusevski បានបណ្ដុះចេញពីថ្នាលយុវជនរបស់ក្លិប Atalanta ហើយបច្ចុប្បន្នរូបគេកំពុងតែលេងអោយក្រុម Parma ក្នុងលក្ខណ្ឌខ្ចីជើង ហើយតម្លៃខ្លួនរបស់រូបគេបច្ចុប្បន្នមានតម្លៃប្រមាណ ២៥លានអឺរ៉ូ (ឬប្រហែល២៧លានដុល្លារអាមេរិក)៕

ប្រភព៖ Caughtoffside