Spurs សម្លឹងឃើញអ្នកចាំទីដៃស្អិត១រូបប្រចាំលីគកំពូលហូរឡង់ជាបេក្ខភាពដ៏សក្ដិសមក្នុងការជំនួសកន្លែងកីឡាករ Hugo Lloris ដែលកំពុងមានបញ្ហារបួស

អង់គ្លេស៖ ក្លិប Tottenham Hotspurs ត្រូវបានគេរាយការណ៍ថាបានចាត់ទុកអ្នកចាំទីដៃស្អិតរបស់ក្លិប Ajax Amsterdam កីឡាករ Andre Onana ជាគោលដៅសំខាន់ក្នុងការជំនួសកន្លែងអ្នកចាំទីសញ្ជាតិបារាំងកីឡាករ Hugo Lloris ដែលកំពុងជួបបញ្ហារបួសកែងដៃ។

កីឡាករ Andre Onana បច្ចុប្បន្នកំពុងជាប់កុងត្រាជាមួយនឹងក្លិប Ajax Amsterdam រហូតដល់ឆ្នាំ២០២២ ប៉ុន្តែក្លិបនឹងអាចលក់រូបគេចេញផងដែរប្រសិនបើពួកគេទទួលបានសំណើសមរម្យណាមួយ ហើយបើយោងតាមការវាយតម្លៃរបស់គេហទំព័រ transfermarkt បានអោយដឹងថាតម្លៃខ្លួនរបស់អ្នកចាំទីរូបនេះបច្ចុប្បន្នមានតម្លៃប្រមាណ៣៥លានផោន (ឬប្រហែល៤៥លានដុល្លារអាមេរិក)។

យើងតាមកាសែត Skysports បានអោយដឹងថាក្លិប Tottenham សម្លឹងឃើញអ្នកចាំទីរូបនេះជាបេក្ខភាពដ៏សក្ដិសមក្នុងការជំនួសកន្លែងកីឡាករ​ Hugo Lloris ដែលត្រូវសម្រាកព្យាបាលរបួសកែងដៃរហូតដល់ឆ្នាំ២០២០។

គួររម្លឹកផងដែរថាកីឡាករ Andre Onana បានបណ្ដុះចេញពីយុវជនថ្នាលរបស់ក្លិប FC Barcelona ដោយផ្ទេរមកកាន់ក្លិប Ajax កាលពីឆ្នាំ២០១៥ ជាមួយនឹងតម្លៃ១៥ម៉ឺនផោន (ឬប្រហែល១៦ម៉ឺនដុល្លារអាមេរិក) ដោយបង្ហាញខ្លួនបានចំនួន ១៥៩ប្រកួត៕

ប្រភព៖ The Sun