អេស្ប៉ាញ៖ តាមសេចក្ដីរាយការណ៍បានអោយដឹងថាក្លិប Real Madrid ត្រៀមនឹងចំណាយប្រាក់ដ៏ច្រើនសន្ធឹកសន្ធាប់ដើម្បីទាក់ទាញចិត្ត Liverpool អោយលក់កីឡាករ Mohamed Salah នៅរដូវក្ដៅឆ្នាំក្រោយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមកាសែត Don Balon បានអោយដឹងថាក្លិប Real Madrid បានត្រៀមកញ្ចប់ទឹកប្រាក់ប្រមាណ១៣០លានអឺរ៉ូ (ឬប្រហែល១៤៥លានដុល្លារអាមេរិក) ដើម្បីព្យាយាមបញ្ចុះបញ្ចូលក្លិបហង្សក្រហម Liverpool អោយលក់ខ្សែបម្រើប្រយុទ្ធឆ្នើមរបស់ពួកគេកីឡាករ Mohamed Salah។
កីឡាករសញ្ជាតិអេហ្ស៊ីបរូបនេះបានអភិវឌ្ឍន៍សមត្ថភាពរបស់ខ្លួន ក្លាយជាកីឡាករដ៏ឆ្នើម១រូបប្រចាំទ្វីបអឺរ៉ុប ដោយបានធ្វើអោយអ្នកគាំទ្រជាច្រើនជុំវិញពិភពលោកមានការភ្ញាក់ផ្អើលពីទម្រង់លេងរបស់រូបគេ ចាប់តាំងពីបានចូលរួមជាមួយនឹង Liverpool ក្រោមការដឹកនាំរបស់លោក Jurgen Klopp កាលពីឆ្នាំ២០១៧មក។
យ៉ាងណាមិញក្នុងរដូវកាលថ្មីនេះរូបគេ នៅតែបង្ហាញទម្រង់លេងបានល្អ ដោយបង្ហាញខ្លួន១៥ប្រកួត ស៊ុតបញ្ចូលទីបាន៨គ្រាប់និងបញ្ជូនបាល់អោយមិត្តរួមក្រុមបញ្ចប់ទីបានចំនួន ៤ដង។ ដូច្នេះវាហាក់បីដូចជាមិនងាយស្រួលនោះទេដែល Liverpool នឹងលក់កីឡាកររូបនេះទៅអោយ Real Madrid ស្រួលៗនោះ។
Salah ជាកូនសោរដ៏សំខាន់១រូបក្នុងក្រុមរបស់លោក Klopp ដោយកីឡាកររូបនេះបានរួមចំណែកជួយក្លិបអោយ Liverpool ឈ្នះពានរង្វាន់ Champions League និងពាន European Super Cup កាលពីរដូវកាលមុន។
គួររម្លឹកផងដែរថាកីឡាករ Mohamed Salah បានចាកចេញពីក្លិប Roma ប្រទេសអ៊ីតាលីមកចូលរួមជាមួយនឹងក្លិបហង្សក្រហម Liverpool កាលពីឆ្នាំ២០១៧ ជាមួយនឹងតម្លៃ៤២លានអឺរ៉ូ (ឬប្រហែល៤៧លានដុល្លារអាមេរិក) ដោយបង្ហាញខ្លួនបានចំនួន១១៩ប្រកួត ស៊ុតបញ្ចូលទីបានចំនួន៧៩គ្រាប់និងបញ្ជូនបាល់អោយមិត្តរួមក្រុមសម្រេចទីបានចំនួន៣៣ដង៕
ប្រភព៖ Caughtoffside