ភ្នំពេញ៖ យន្ដហោះ Airbus A320 បានចុះចតយ៉ាងរលូន នៅអាកាសយានដ្ឋានអន្តរជាតិភ្នំពេញនៅវេលាម៉ោង ១០ និង ៣៣ នាទីព្រឹក នាថ្ងៃទី ១៩ ខែកញ្ញាឆ្នាំ ២០១៩ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបន្ទាប់ពីបានបញ្ចប់ការបាញ់ថ្នាំតុបតែងដ៏ប្រណីត និងការសាកល្បងហោះហើររបស់ខ្លួននៅទីស្នាក់ការកណ្តាលរបស់ក្រុមហ៊ុន Airbus Group SE នៅប្រទេសបារាំង ដែលមានលេខចុះបញ្ជី XU-761 យន្តហោះបានចាកចេញពីទីក្រុង Toulouse នៃអាកាសយានដ្ឋាន Blagnac នាវេលាម៉ោង ១១ និង ៣០ នាទីព្រឹក នៅថ្ងៃទី១៧ ខែកញ្ញា និងបន្ទាប់ពីការឈប់សំចតនៅអាកាសយានដ្ឋានអន្តរជាតិឌូបៃអាល់ម៉ាធូម រយៈពេលបីម៉ោងរួចមក យន្តហោះបានចុះចតដោយសុវត្ថិភាពនៅអាកាសយានដ្ឋានអន្តរជាតិភ្នំពេញនៅវេលាម៉ោង ១០ និង ៣៣ នាទី នៅថ្ងៃទី១៩ ខែកញ្ញា ដោយមានការបាញ់ទឹកទទួលស្វាគមន៍យ៉ាងកក់ក្តៅពីសំណាក់អាកាសយានដ្ឋានអន្តរជាតិភ្នំពេញផងដែរ។
ស្លាកសញ្ញាប្រាសាទអង្គរវត្តដែលមានតែមួយ ជាមួយកន្ទុយដែលមានពពកពណ៌សរបស់ ក្រុមហ៊ុនអាកាសចរណ៍ខេមបូឌាអ៊ែរវ៉េ ត្រូវបានរំលេចខ្លួនឡើងធ្វើឲ្យសាធារណជនបានមើលឃើញនឹងដឹងឮថា ក្រុមហ៊ុនអាកាសចរណ៍ខេមបូឌាអ៊ែរវ៉េ បានទទួលយន្តហោះម៉ាក Airbus A320 ថ្មីរបស់ខ្លួនមួយគ្រឿងបន្ថែមទៀតហើយ។ ការបន្ថែមយន្តហោះមួយគ្រឿងទៀតនេះ គឺដើម្បីបង្ហាញពីកសិនសាក្សីក្នុងការរក្សានូវគម្រោងពង្រីកបន្ថែមចំនួនយន្តហោះរបស់ខ្លួន ហើយរហូតមកដល់ពេលនេះ ក្រុមហ៊ុនអាកាសចរណ៍ខេមបូឌាអ៊ែរវ៉េ មានយន្ដហោះចំនួន ០៤ (បួន) គ្រឿងហើយ។
សូមបញ្ជាក់ដែរថា នេះជាលើកទីមួយហើយ ដែលមានមន្រ្តីអាជ្ញាធររបស់រដ្ឋលេខាធិការដ្ឋានអាកាសចរស៊ីវិល បានផ្តល់កិត្តិយសរួមដំណើរជាមួយក្រុមអាកាសយាន្តនិករបស់ ក្រុមហ៊ុនអាកាសចរណ៍ខេមបូឌាអ៊ែរវ៉េ ដើម្បីនាំយកយន្តហោះមួយគ្រឿងនេះមកពីប្រទេសបារាំង។ ក្នុងពិធីស្វាគមន៍នៅអាកាសយានដ្ឋានអន្តរជាតិភ្នំពេញមានការចូលរួមពីសំណាក់ក្រុមអ្នកគ្រប់គ្រងជាន់ខ្ពស់ បុគ្គលិកពាក់ព័ន្ធនៃ ក្រុមហ៊ុនអាកាសចរណ៍ខេមបូឌាអ៊ែរវ៉េ មន្រ្តីអាជ្ញាធររបស់រដ្ឋលេខាធិការដ្ឋានអាកាសចរស៊ីវិល និងតំណាងរបស់អាកាសយានដ្ឋានអន្តរជាតិភ្នំពេញ ព្រមទាំងបានរៀបចំបាច់ផ្កាជូនដល់សមាជិកអាកាសយាន្តនិកទាំងអស់ក្រោមបរិយាកាសដ៏រីករាយក្រៃលែង និងបានថតរូបរួមគ្នា ដើម្បីទុកជាអនុស្សាវរីយ៍នាឱកាសដ៏មានសារៈសំខាន់នេះ។
លើសពីនេះទៀត ក្រុមហ៊ុនអាកាសចរណ៍ខេមបូឌាអ៊ែរវ៉េក៏បាននិមន្តព្រះសង្ឃ ដើម្បីប្រោះព្រំប្រសិទ្ធពរដល់យន្តហោះថ្មីនេះ តាមទំនៀមទម្លាប់ព្រះពុទ្ធសាសនាផងដែរ។
មុនពេលការមកដល់នៃយន្តហោះថ្មីនេះ ក្រុមហ៊ុនអាកាសចរណ៍ខេមបូឌាអ៊ែរវ៉េ បាននឹងកំពុងប្រតិបត្តិការជាមួយយន្តហោះ Airbus A319 ចំនួន ០៣ (បី) គ្រឿង ដែលបម្រើសម្រាប់គោលដៅក្នុងស្រុករបស់ប្រទេសកម្ពុជា និងអន្តរជាតិជាច្រើនរួមមាន ទីក្រុងភ្នំពេញ ក្រុងព្រះសីហនុ សៀមរាប ម៉ាកាវ បាងកក និងហ្វូចូវ ។ល។
ដូច្នេះបច្ចុប្បន្នចំនួនយន្ដហោះត្រូវបានពង្រីកដល់ចំនួន ០៤ (បួន) គ្រឿងហើយជាមួយនឹងការបន្ថែមនូវយន្ដហោះ Airbus A320 ថ្មីនេះដែលអាចធ្វើឱ្យ ក្រុមហ៊ុនអាកាសចរណ៍ខេមបូឌាអ៊ែរវ៉េ ជួយសម្រួលដល់វិស័យទេសចរណ៍ និងឱកាសពាណិជ្ជកម្មពិភពលោកនាពេលអនាគតកាន់តែខ្លាំងទ្បើងឥតឈប់ឈរ។
សូមបញ្ជាក់ផងដែរថា ជាមួយនឹងការនាំចូលយន្ដហោះជាបន្តបន្ទាប់បន្ថែមទៀត ក្រុមហ៊ុនអាកាសចរណ៍ខេមបូឌាអ៊ែរវ៉េ នឹងបន្តការយកចិត្តទុកដាក់ក្នុងការរៀបចំបណ្តាញផ្លូវតភ្ជាប់ទូលំទូលាយដែលយករាជធានីភ្នំពេញជាមជ្ឈមណ្ឌលកណ្តាលរបស់ខ្លួន ដោយគ្របដណ្ដប់ទាំងប្រទេសចិន និងអាស៊ាន ដើម្បីភ្ជាប់ទៅអាស៊ីឥសាន្ត អឺរ៉ុប ក៏ដូចជាអាមេរិកខាងជើង ដើម្បីលើកកម្ពស់ការផ្លាស់ប្តូរវប្បធម៌រវាងប្រជាពលរដ្ឋកម្ពុជា និងប្រទេសដទៃទៀត ក៏ដូចជាការស្ថាបនាសម្ព័ន្ធភាពរវាងព្រះរាជាណាចក្រកម្ពុជា និងពិភពលោក៕
Bong I.T