អេស្ប៉ាញ៖ ក្លិប Valencia បានបណ្តេញគ្រូបង្វឹកលោក Marcelino Garcia Toral ដែលទើបតែដឹកនាំបាន៣ប្រកួតប៉ុណ្ណោះក្នុងរដូវកាលនេះនៅក្របខណ្ឌ La Liga ។ គាត់ត្រូវបានជំនួសដោយអតីតកីឡាកររបស់ក្លិប Real Madrid និង Barcelona លោក Albert Celades ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Valencia បានយកឈ្នះក្រុម Mallorca ក្នុងលទ្ធផល ២-០ ក្នុងការប្រកួតចុងក្រោយរបស់ពួកគេប៉ុន្តែវាគឺជាជ័យជម្នះតែមួយគត់របស់ពួកគេនៅរដូវកាលនេះដោយឈរនៅចំណាត់ថ្នាក់លេខ ១០ ក្នុងតារាង។
យ៉ាងណាក៏ដោយពួកគេបានបញ្ចប់ក្នុងចំណាត់ថ្នាក់លេខ ៤ ក្នុងលីគកាលពីរដូវកាលមុន ព្រមទាំងឈ្នះពានរង្វាន់ Copa del Rey និងឈានដល់វគ្គពាក់កណ្តាលផ្តាច់ព្រ័ត្រនៃពានរង្វាន់ Europa League ។
លោក Marcelino ធ្លាប់ជាគ្រូបង្វឹកដែលដឹកនាំក្រុម Valencia បានយូរជាងគេបំផុតចាប់តាំងពីលោក Unai Emery ដែលជាគ្រូបង្វឹករបស់ក្រុម Arsenal បានចាកចេញកាលពីឆ្នាំ ២០១២ ។
ក្លិបបានប្រកាសពីការចាកចេញរបស់ Marcelino នៅលើគេហទំព័ររបស់ពួកគេនៅព្រឹកថ្ងៃនេះថា៖
"ក្លិប Valencia CF សូមជូនដំណឹងដល់លោក Marcelino García Toral អំពីការសម្រេចចិត្តរបស់ពួកគេក្នុងការបញ្ចប់ភារកិច្ចរបស់គាត់ក្នុងនាមជាគ្រូបង្វឹកក្រុមចាប់ពីថ្ងៃពុធនេះតទៅ។ ក្លិបសូមថ្លែងអំណរគុណដល់លោក Marcelino ចំពោះការខិតខំនិងការលះបង់របស់លោកក្នុងពេលដែលលោកធ្វើជាគ្រូបង្វឹកន្លងមក ហើយសូមជូនពរឱ្យលោកទទួលបានជោគជ័យនាពេលអនាគត។"
គួរបញ្ជាក់ផងដែរថាក្លិប Valencia ជាកម្មសិទ្ធិរបស់អ្នកជំនួញជនជាតិសិង្ហបុរីលោក Peter Lim ដែលមានភាគហ៊ុន៤០ ភាគរយ ។ មហាសេដ្ឋីរូបនេះបានជួយផ្តល់ថវិកាដល់ការវិនិយោគចំនួន ៧៦ លានផោនទៅអោយក្រុមនារដូវក្តៅនេះដោយបាននាំយកកីឡាករ៤រូបមានដូចជាកីឡាករ Maxi Gomez, Denis Cheryshev, Jasper Cillessen និង Eliaquim Mangala ៕
ប្រភព៖ thesun
Bong I.T