ការលើកឡើងរបស់អ្នកគាំទ្រ!! ក្រោយអវត្តមានខ្សែប្រយុទ្ធកំពូល ២រូបក្នុងបញ្ជីឈ្មោះបឋមក្រុមជម្រើសជាតិ

ភ្នំពេញ៖ កាលពីល្ងាចថ្ងៃម្សិលមិញនេះ សហព័ន្ធកីឡាបាល់ទាត់កម្ពុជា បានបញ្ចេញឈ្មោះបឋមកីឡាករទាំង ៣៥រូប ដើម្បីហ្វឹកហាត់ត្រៀមចូលរួមការប្រកួត FIFA World Cup Qatar 2022 & Asian Cup 2023 Qualifiers វគ្គជម្រុះ Preliminary Joint Qualification ជុំទី២។

នៅក្នុងបញ្ជីឈ្មោះកីឡាករទាំង ៣៥រូបនោះគេមិនឃើញមានឈ្មោះខ្សែប្រយុទ្ធជួរមុខក្នុងក្រុមជម្រើសជាតិ ២រូបគឺកីឡាករ ចាន់ វឌ្ឍនាកា របស់បឹងកេត និងប្រាក់ មុន្នីឧត្តម របស់ព្រះខ័នរាជស្វាយរៀងឡើយ។ ប៉ុន្តែគេ ឃើញមានឈ្មោះខ្សែប្រយុទ្ធវ័យក្មេងជាច្រើនដូចជា សៀង ចន្ធា, ទៀត គឺមហេង និង ស៊ិន កក្កដា ជាដើម។ គេក៏សង្កេតឃើញមានការត្រឡប់មកវិញនូវអ្នកចាំទី ស៊ូ យ៉ាទី និងខ្សែបម្រើ ហូយ ផល្លីនផងដែរ ក្រោយមិនត្រូវបានកោះហៅកាលពីជម្រុះជុំទី១។

ជាមួយនឹងការសម្រេចចិត្តរបស់គ្រូបង្វឹកលោក Felix Dalmas នេះបានធ្វើឲ្យអ្នកគាំទ្រមួយចំនួនសម្ដែងនូវការពេញចិត្ត រីឯអ្នកគាំទ្រខ្លះទៀតក៏បានសម្ដែងនូវការមិនពេញចិត្តតាមរយៈការបញ្ចេញមតិទៅលើទំព័រហ្វេសប៊ុកផ្លូវការរបស់សហព័ន្ធកីឡាបាល់បាល់ទាត់កម្ពុជា និងការចែករំលែករូបភាពជាដើម។

គួរបញ្ជាក់ផងដែរថា ក្រុមគោព្រៃកម្ពុជា និងត្រូវបើកទ្វារពហុកីឡដ្ឋានជាតិស្វាគមន៍ក្រុមជម្រើសជាតិហុងកុង ដែលជាជំនួបដំបូងក្នុងការជម្រុះជុំទី២ នៅថ្ងៃទី០៥ ខែកញ្ញា ឆ្នាំ២០១៩ វេលាម៉ោង ៦:៣០នាទី ខណៈសំបុត្រកំពុងតែដាក់លក់នៅបញ្ជោរមុខពហុកីឡដ្ឋានជាតិ៕