កូរ៉េខាងត្បូង៖ ខណៈពេលដែលអ្នកគាំទ្រកំពុងតែរំភើបចិត្តជាមួយបទថ្មីរបស់ក្រុម Red Velvet មានចំណងជើងថា “Umpah Umpah” ទើបតែចេញ ស្រាប់តែមានគណនីអ្នកច្នៃម៉ូតម្នាក់មានឈ្មោះថា paris99 បានចេញមុខថា ក្រុមចម្រៀងនេះបានលួចចម្លងស្នាដៃរបស់ពួកគេ សម្រាប់សម្លៀកបំពាក់ក្នុងបទចម្រៀង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងនោះដែរ គណនីអ្នកច្នៃម៉ូតម្នាក់នោះ បានសរសេរបែបនេះថា៖
“គ្មាននរណាម្នាក់ នៃក្រុមការងាររបស់ពួកគេ ទាក់ទងពួកយើងដើម្បីធ្វើការជាមួយគ្នា ក្នុងការច្នៃម៉ូតនេះទេ។ ពួកគេបានយកអ្វីដែលជាការគិតរបស់ពួកយើង ដែលពួកយើងខិតខំធ្វើការយ៉ាងលំបាកដើម្បីបង្កើតវា”។
មិនត្រឹមតែប៉ុណ្ណោះ អ្នកច្នៃម៉ូតម្នាក់នោះថែមទាំង បង្ហោះរូបជាច្រើនសន្លឹកបង្ហាញពីសម្លៀកបំពាក់របស់ក្រុម Red Velvet ក្នុងបទថ្មី ប្រៀបធៀបជាមួយនឹងសម្លៀកបំពាក់ដែលពួកគេច្នៃ ក្នុង Story IG របស់ពួកគេផងដែរ។
ទោះជាយ៉ាងណាក្តី ក្រោយពីឃើញបែបនេះ អ្នកគាំទ្រពិតជាមិនសប្បាយចិត្តនោះទេ ហើយពួកគេក៏ទទូចសុំការបកស្រាយពីផលិតកម្ម ក៏ដូចជាអ្នករៀបចំសម្លៀកបំពាក់ឲ្យក្រុម Red Velvet ផងដែរ ព្រោះពួកគេពិតជាមិនចង់ឃើញក្រុមចម្រៀងដែលពួកគេស្រលាញ់ មានឈ្មោះលួចចម្លងស្ទីលតាមអ្នកដ៏ទៃនោះឡើយ៕
តើប្រិយមិត្តយល់យ៉ាងណាដែរ?
Bong I.T