អង់គ្លេស៖ អតីតខ្សែប្រយុទ្ធកំពូលរបស់ក្លិបបិសាចក្រហម Manchester United កីឡាករ Wayne Rooney បានសរសើរអ្នកចាត់ការទូទៅរបស់ហង្សក្រហម Liverpool ដោយបានហៅលោក Jurgen Klopp ថា “បុគ្គលអស្ចារ្យ”។
អ្នកចាត់ការទូទៅសញ្ជាតិអាល្លឺម៉ង់លោក Jurgen Klopp បានចូលខ្លួនមកដឹកនាំ Liverpool ក្នុងឆ្នាំ ២០១៥ ក្រោយជួយឲ្យ Borussia Dortmund ឈ្នះពានរង្វាន់ក្របខណ្ឌកំពូល Bundesliga ចំនួន ២ដង និង DFB-Pokal មួយដង ព្រមបានទាំងជួយឲ្យ Dortmund ឡើងទៅដល់វគ្គផ្ដាច់ព្រ័ត្រ Champions League កាលពីរដូវកាល ២០១២-២០១៣។
ជាមួយការដឹកនាំ Liverpool លោក Klopp បានជួយឲ្យក្រុមរហស្សនាមហង្សក្រហមរងជើងឯកពានរង្វាន់ UEFA Europa League ម្ដង កាលពីរដូវកាល ២០១៥-២០១៦ និងរងជើងឯក UEFA Champions League ក្នុងរដូវកាល ២០១៧-២០១៨។ ប៉ុន្តែកាលពីរដូវកាលមុន Klopp បានដឹកនាំ Liverpool ឲ្យក្លាយជាម្ចាស់ជើងឯកពានរង្វាន់ក្លិបអាជីពទីមួយនៅអឹរ៉ុនគឺ UEFA Champions League ក្រោយយកឈ្នះ Tottenham Hotspur ក្នុងវគ្គផ្ដាច់ព្រ័ត្រដោយលទ្ធផល ២-០។
ជុំវិញការដឹកនាំជោគជ័យរបស់លោក Klopp យ៉ាងនេះ បានធ្វើឲ្យអតីតខ្សែប្រយុទ្ធរបស់ Man UTD និង Everton កីឡាករ Wayne Rooney ពិតជាមិនអាចមិនសរសើរលោកបាននោះទេ។
ថ្លែងប្រាប់ទៅកាន់ Sport Bild អតីតជម្រើសជាតិអង់គ្លេសរូបនេះបាននិយាយថា “Jurgen គឺជាអ្នកចាត់ការទូទៅមួយរូប ដែលកីឡាករទាំងអស់ចង់លេងជាមួយ។ អ្នកទាំងអស់គ្នាអាចឃើញ កីឡាកររបស់គាត់សប្បាយចិត្តក្នុងការលេងក្រោមការដឹកនាំរបស់គាត់។ ខ្ញុំធ្លាប់បានជួបគាត់ម្ដង គាត់ពិតជាបុគ្គលដ៏អស្ចារ្យមួយរូប។”
Rooney បន្តថា “កំហុសតែមួយរបស់គាត់ គឺការធ្វើការឲ្យ LFC (Liverpool Football Club) ហើយជោគជ័យនៅទីនោះ។ ខ្ញុំពិតជាសម្ដែងនូវការគោរពចំពោះ Jurgen Klopp ជាមួយអ្វីដែលគាត់បានទទួល មិនថាតែជាមួយ Liverpool នោះទេ Dortmund ក៏ដូចគ្នា។”
ប្រភព៖ GOAL
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
