គួរឲ្យសរសើរ! សួស វីហ្សា មានទឹកចិត្តសប្បុរសធម៌ ត្រៀមរៀបចំយកអំណោយទៅចែកជូនដល់ជនចាស់ជរា! (មានវីដេអូ)

ភ្នំពេញ៖ មួយរយៈពេលនេះ គេសង្កេតឃើញថា កញ្ញា សួស វីហ្សា​ ហាក់បីដូចជាទទួលបានការចាប់អារម្មណ៍ច្រើនពីសំណាក់មហាជន បន្ទាប់ពីមានទំនាក់ទំនងស្នេហាយ៉ាងស្អិតរមួត ជាមួយនឹងកំលោះសង្ហាសម្បុរស្រអែម និងជាតារាសម្ដែង លោក ថមមី រហូតឈានដល់ចំណងភ្ជាប់ពាក្យជាផ្លូវការជាមួយគ្នាថែមទៀតផង។ 

យ៉ាងណាមិញ ថ្មីៗនេះវិញ កញ្ញា សួស វីហ្សា រឹតតែធ្វើឲ្យប្រិយមិត្តអ្នកគាំទ្រ មានការចាប់អារម្មណ៍ និងកោតសរសើរលើនាងជាថ្មីទៀតហើយ បន្ទាប់ពីរូបនាងបានបង្ហោះចែកចាយវីដេអូឃ្លីបមួយ ជុំវិញនឹងសកម្មភាពសប្បុរសធម៌របស់នាង។  

ជាក់ស្ដែង តាមរយៈវីដេអូឃ្លីបនោះ តារាស្រីរូបនេះបានបង្ហាញពីសកម្មភាពដែលកំពុងរៀបចំសម្ភារមានដូចជា កន្ទេល មុង ភួយ និងស្បៀងអាហារមួយចំនួនទៀត សម្រាប់ត្រៀមចែកជូនដល់ជនចាស់ជរាគ្មានទីពឹងនៅតាមទីសារធារណៈ។

អ្វីដែលពិសេសនោះ នាងក៏បានផ្ញើសារដាស់តឿន ក៏ដូចជាក្រើនរម្លឹកដល់មិត្តៗយុវវ័យ គួរឆ្លៀតយកពេលវេលា និងថវិការផ្ទាល់ខ្លួនខ្លះៗ ដើម្បីចូលរួមចំណែកធ្វើអំពើសប្បុរសធម៌ ជួយដល់សង្គមឲ្យបានច្រើន ជាជាងធ្វើរឿងឥតប្រយោជន៍ផងដែរ។

ក្រោយពីឃើញទឹកចិត្តដ៏ថ្លៃថ្លារបស់តារាស្រីរូបនេះហើយ ក៏បានធ្វើឲ្យហ្វេនៗមានការគាំទ្រ និងបញ្ចេញមតិកោតសរសើរ ដល់រូបនាងគ្រប់ៗគ្នាតែម្ដង៕ 

ចង់ជ្រាបច្បាស់ តាមដានទស្សនាវីដេអូខាងក្រោម៖

• សួស វីហ្សា
• វីដេអូ
• តារាខ្មែរ