ដូចធ្លាប់ប្រាប់ចឹង លើសឈាម មិនមែនជាជំងឺសម្រាប់តែចាស់ៗទេ វ័យខ្ទង់ ២០-៣០ ឆ្នាំ បើមិនចេះប្រយ័ត្នប្រយែង អាចលើសឈាមគ្រប់ពេល។ យ៉ាងណា បើមានជំងឺរាំរ៉ៃនេះ ជាប់ខ្លួនទៅហើយ ត្រូវតែប្រើថ្នាំដើម្បីបង្ការកុំឲ្យធ្ងន់ធ្ងរ ព្រោះអាចប៉ះពាល់គ្រប់សរីរាង្គទាំងអស់ក្នុងរាងកាយ។ ប៉ុន្តែការប្រើថ្នាំលើសឈាម ក៏ត្រូវប្រយ័ត្នប្រយែងដូចគ្នា ព្រោះបើប្រើខុស នឹងប្រឈមហានិភ័យបញ្ហាសុខភាពជាច្រើនដូចខាងក្រោម៖
១- ថ្នាំបញ្ចុះទឹកនោម (Diuretics)
ចំពោះថ្នាំបញ្ចុះទឹកនោម(Diuretics) អាចនឹងបង្កផលរំខានដូចជា៖
– នោមញឹកជាងធម្មតា ព្រោះថ្នាំនេះ អាចជួយបញ្ចុះសម្ពាធឈាម តាមរយៈការបន្ថយបរិមាណជាតិទឹកនៅក្នុងខ្លួន ហេតុនេះ យើងនឹងត្រូវទៅបន្ទប់ទឹកញឹកជាងធម្មតា។
– ថ្នាំបញ្ចុះទឹកនោមខ្លះ ធ្វើឲ្យថយចុះបរិមាណជាតិប៉ូតាស្យូម ដែលអាចបង្កឲ្យមានរោគសញ្ញា ខ្សោយ អស់កម្លាំង ឬរមួលក្រពើ ។ គ្នាយើង ឬម៉ាក់អ៊ំ មានជំងឺលើសឈាម ត្រូវញ៉ាំអាហារមានជាតិប៉ូតាស្យូមឲ្យបានច្រើន ដើម្បីចៀសវាងការបាត់បង់សារធាតុនេះ។
– ប្រើថ្នាំបញ្ចុះទឹកនោមរយៈពេលយូរ អាចមានបញ្ហាជំងឺប្រគ្រីវ (Gout attack)។ ទោះយ៉ាងនេះក្ដី បញ្ហានេះមិនសូវកើតមានញឹកញាប់ទេ ហើយគ្រូពេទ្យ អាចគ្រប់គ្រងស្ថានការណ៍បាន។
–ប្រសិនយើងមាន ជំងឺទឹកនោមផ្អែម ហើយប្រើថ្នាំបញ្ចុះទឹកនោម អាចធ្វើឲ្យកម្រិតជាតិស្ករក្នុងឈាមកើនឡើង។ យ៉ាងណា ករណីជាច្រើនអាចគ្រប់គ្រង បានដោយគ្រាន់តែគ្រប់គ្រងរបបអាហារឲ្យបានត្រឹមត្រូវ ប្រើថ្នាំ ឬកែប្រែកម្រិតថ្នាំឡើងវិញ។
– ប្រុសៗមួយចំនួន អាចមានបញ្ហាលិង្គមិនឡើងរឹង (Erection problem) ដោយសារតែប្រើថ្នាំបញ្ចុះទឹកនោមនេះ។
២- ពពួកថ្នាំ Beta blockers
គ្រោះថ្នាក់ និងផលរំខាននៃការប្រើពពួកថ្នាំ Beta blockers រួមមាន៖
– ត្រជាក់ដៃជើង ខណៈរោគសញ្ញាទាំងនេះ ងាយកើតមានណាស់
– រោគសញ្ញាជំងឺហឺត ដូចជា ក្អក ដកដង្ហើមឮសូរ ឈឺទ្រូង ណែនទ្រូង (Chest pressure) ឬដកដង្ហើមខ្លីៗ
– បាក់ទឹកចិត្ត និងហត់នឿយខ្លាំង
– បញ្ហាក្នុងការគេង ដូចជាពិបាកគេងឲ្យបានស្កប់ស្កល់
– ប្រុសៗខ្លះ មានបញ្ហាលិង្គមិនឡើងរឹង
– ស្រីៗមានផ្ទៃពោះ គួរពិគ្រោះជាមួយគ្រូពេទ្យសិន មុននឹងប្រើថ្នាំនេះ។
៣- ពពួកថ្នាំ ACE inhibitors
គ្រោះថ្នាក់ និងផលរំខាននៃការប្រើថ្នាំ ACE inhibitors រួមមាន៖
– ក្អកស្ងួតរ៉ាំរ៉ៃ
– រមាស់ស្បែក
– ករណីខ្លះ អាចប៉ះពាល់តម្រងនោម
– បាត់បង់រសជាតិ នាំឲ្យគ្នាយើងមានជំងឺលើសឈាម មិនចង់ញ៉ាំអាហារធ្លាប់ចូលចិត្ត និងមិនចង់ញ៉ាំអ្វីទាំងអស់។
៤- ពពួកថ្នាំ Angiotensin II receptor blockers (ARBs)
ថ្នាំនេះ អាចធ្វើឲ្យវិលមុខ ហើយចំពោះស្រីៗមានផ្ទៃពោះ មិនគួរប្រើថ្នាំនេះទេ ដូចនេះ គួរពិគ្រោះជាមួយគ្រូពេទ្យសិន។
៥- ពពួកថ្នាំ Calcium Channel blockers
គ្រោះថ្នាក់និងផលរំខាននៃការប្រើថ្នាំនេះរួមមាន៖
– ទល់លាមក
– ហើមកំភួនជើង
– ឈឺក្បាល
– បេះដូងលោតមិនប្រក្រតី
– វិលមុខ
៦- ពពួកថ្នាំ Alpha Blockers
គ្រោះថ្នាក់ និងផលរំខានប្រើថ្នាំនេះរួមមាន៖
– ចង្វាក់បេះដូងលោតញាប់
– វិលមុខ ខ្សោយកម្លាំង
– អារម្មណ៍ស្រាលក្បាល ពេលក្រោកឈរឡើងភ្លាមៗ។
៧- ពពួកថ្នាំ Alpha-beta Blockers
ពពួកថ្នាំ Alpha-beta Blockers ជាប្រភេទថ្នាំចាក់តាមសរសៃ ពេទ្យច្រើនប្រើថ្នាំនេះ ដើម្បីពន្យឺតចង្វាក់បេះដូង។ ថ្នាំនេះអាចធ្វើឲ្យសម្ពាធឈាមធ្លាក់ចុះភ្លាមៗ ហើយពេលយើងក្រោកឡើង នាំឲ្យវិលមុខ និងមានអារម្មណ៍ស្រាលក្បាល។
៨- ពពួកថ្នាំ Alpha-2 receptor agonists
ថ្នាំនេះ អាចនាំឲ្យវិលមុខ និងងងុយគេង។
៩- ពពួកថ្នាំ Central agonists
ក្រុមថ្នាំនេះ ជួយសម្រួលសរសៃឈាម ធ្វើឲ្យសម្ពាធឈាមធ្លាក់ចុះ។ យ៉ាងណា វាក៏អាចធ្វើឲ្យសម្ពាធឈាមធ្លាក់ចុះខ្លាំងពេលក្រោកឈរ ឬដើរ ធ្វើឲ្យយើងខ្សោយ ឬសន្លប់ភ្លាមៗ ប្រសិនបើសម្ពាធឈាមធ្លាក់ចុះទាបពេក។ ផលរំខានផ្សេងទៀត រួមមាន ស្ងួតមាត់ គ្រុនក្ដៅ ងងុយគេង ទល់លាមក វិលមុខ មានអារម្មណ៍ស្រាលក្បាល ឬបាត់បង់សមត្ថភាពផ្លូវភេទចំពោះប្រុសៗមានជំងឺលើសឈាម។
១០- ពពួកថ្នាំ Pereipheral Adrenergic inhibitors
ពពួកថ្នាំនេះ អាចបណ្ដាលឲ្យរាក ក្រហាយទ្រូង តឹងច្រមុះ ខ្សោយកម្លាំង និងមានអារម្មណ៍ស្រាលក្បាល ពិសេសពេលក្រោកពីដំណេក នៅពេលព្រឹក។ បើធ្លាប់មាន សុបិនអាក្រក់ ឬបញ្ហាដំណេកជាញឹកញាប់ សូមពិគ្រោះជាមួយគ្រូពេទ្យ។
១១- ពពួកថ្នាំពង្រីកសរសៃឈាម (Vasodilators)
ថ្នាំនេះ ជួយសម្រួលបន្ធូរសរសៃឈាម ប៉ុន្តែវាអាចបណ្ដាលឲ្យហើមជុំវិញភ្នែក ឈឺក្បាល ចង្វាក់បេះដូងលោតខុសប្រក្រតី និងបណ្ដាលឲ្យសក់ដុះច្រើនជ្រុល។ ថ្នាំទាំងអស់ សុទ្ធតែមានផលរំខាន ហើយថ្នាំលើសឈាមក៏មានដូចគ្នា។ ទោះយ៉ាងនេះក្ដី ផលប្រយោជន៍របស់ថ្នាំ គឺមានសារសំខាន់ជាងហានិភ័យ បើសិនមានបញ្ហាជាមួយផលរំខាន ឬសម្គាល់ឃើញមានរោគសញ្ញាធ្ងន់ធ្ងរអ្វីមួយ សូមទៅជួបគ្រូពេទ្យឲ្យលឿនបំផុត តាមដែលអាចធ្វើបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]