ថៃ៖ កាលពីយប់ថ្ងៃទី ១៧ ខែមិថុនា កន្លងទៅនេះ មានភាពភ្ញាក់មួយបានកើតឡើង ដោយសមត្ថកិច្ចបានចុះបង្រ្កាបសកម្មភាព ជួញដូរគ្រឿងញៀនដ៏កក្រើកមួយកន្លែង ដែលមានភាពល្បីល្បាញជាយូរមកហើយ។
ហើយអ្វីដែលគួរឱ្យភ្ញាក់ផ្អើលខ្លាំងជាងនេះទៅទៀតនោះគឺ គេស្រាប់តែបានប្រទះឃើញអតីតតារាចម្រៀងស្រីល្បីឈ្មោះអ្នកនាង Pookie ឬ Pritsana Priesang ម្ចាស់បទ «SHA-LA-LA-LA» ក៏មានជាប់ពាក់ព័ន្ធក្នុងករណីជួញដូរគ្រឿងញៀននេះផងដែរ។
ដោយនៅក្នុងយប់នោះ សមត្ថកិច្ចបានរកឃើញថ្នាំញៀនប្រភេទ Ketamine ចំនួន ៥.២ គីឡូក្រាមនៅក្នុងផ្ទះសំណាក់ ដែលអតីតតារាចម្រៀងស្រី Pookie និងមិត្តប្រុសកំពុងស្នាក់នៅ។
ហើយនៅទីបំផុតនាងក៏បានចេញមុខមកសារភាពថា ថ្នាំនេះត្រូវបាននាង និងមិត្តប្រុសរក្សាទុក ដើម្បីលក់ទៅឱ្យជនជាតិតៃវ៉ាន់នៅក្រៅប្រទេស និងមានថ្នាំញៀនប្រភេទផ្សេងៗជាច្រើនមុខទៀតដូចជា យ៉ាម៉ា កញ្ឆា និងឧបករណ៍សេពគ្រឿងញៀនដទៃទៀត ដែលនាងបានផលិតដោយខ្លួនឯង និងធ្វើការជួញដូរអស់រយៈពេលជាច្រើនឆ្នាំណាស់មកហើយ។
គួរឱ្យដឹងផងដែរថា អតីតតារាចម្រៀងស្រី Pookie កូនកាត់ថៃ-អូស្រ្តាលី គឺជាតារាស្រីមួយដួង ដែលធ្លាប់បានទទួលនូវភាពល្បីល្បាញយ៉ាងខ្លាំង ដោយសារបទចម្រៀង «SHA-LA-LA-LA» ពេលនោះរកចំណូលបានរាប់លានបាតឯណោះ។
ប៉ុន្តែក្រោយមកជីវិតនាងក៏មានរឿងអាស្រូវ ដោយបានមានផ្ទៃពោះមុនរៀបការជាមួយនឹងអ្នកដឹកនាំរបស់ខ្លួន ហើយក៏បានដកខ្លួនចេញពីវិថីសិល្បៈ។ បន្តមកជីវិតនាងហាក់គ្មានក្តីសុខឡើយ ដោយធ្លាប់បានឆ្លងកាត់ការរៀបការចំនួន៣ដងឯណោះ រហូតមានពេលមួយ នាងគិតខ្លីចង់សម្លាប់ខ្លួនថែមទៀតផងដែរ។ មកដល់បច្ចុប្បន្ន Pookie មានអាយុ ៤០ ឆ្នាំហើយ ហើយក៏កំពុងតែជាប់ឃុំឃាំង ដើម្បីសួររឿងក្តីជួញដូរ និងប្រើប្រាស់គ្រឿងញៀន ដែលកំពុងតែកក្រើកវិស័យសិល្បៈនាពេលនេះ។
ទន្ទឹមនឹងនេះ ក៏មានអ្នកគាំទ្រជាច្រើនបានសម្តែងក្តីខកចិត្តយ៉ាងខ្លាំង មិនគួរណាតារាស្រីដែលធ្លាប់មានកេរ្តិ៍ឈ្មោះល្បីល្បាញ ត្រូវមកអស់អនាគតតែត្រឹមនេះសោះ៕
ទស្សនារូបភាព និងវីដេអូដូចខាងក្រោមនេះទាំងអស់គ្នា៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]