ភ្នំពេញ៖ ហាងលក់សម្ភារៈកីឡាដ៏ធំប្រចាំកម្ពុជា Decathlon បានរៀបចំទិវាកីឡាលើកទី២ (Sport Festival) ក្នុងផ្សារទំនើបអ៊ីអនសែនសុខ ដោយអនុញ្ញាតឱ្យមហាជនចូលរួមលេងយ៉ាងកុះករ កាលពីថ្ងៃទី១៦ ខែមិថុនា ឆ្នាំ២០១៩។
លោក ចេប៊ី (JEAN BAPTISTE PRIGENT) អ្នកគ្រប់គ្រង Decathlon បានថ្លែងថានៅក្នុងប្រទេសកម្ពុជាយើងចង់ជួយអភិវឌ្ឍសហគមន៍កីឡា តាមរយៈការជួយលើកទឹកចិត្តប្រជាជនខ្មែរឲ្យសាកល្បងកីឡាថ្មី និងដើម្បីយល់ពីអត្ថប្រយោជន៍ខ្ពស់ចំពោះការលេងកីឡាដើម្បីសុខភាព។ នេះជាហេតុផល ដែលយើងសហការគ្នានៅថ្ងៃនេះជាមួយដៃគូចំនួន ១៦ (រួមមានក្លឹបកីឡា និងសហព័ន្ធកីឡា) និងជួយអ្នកប្រើប្រាស់របស់យើងស្វែងរក និងបានសាកល្បងកីឡាថ្មីៗជាមួយនឹងផលិតផល Decathlon ។
អ្នកគ្រប់គ្រង Decathlon រូបនេះបាននិយាយថា៖
«ខ្ញុំសូមអរគុណដល់ដៃគូទាំងអស់របស់យើង ដែលបានចូលរួមចំណែកក្នុងការជួយឲ្យព្រឹត្តិការណ៍នេះអាចធ្វើឡើងទៅបាននៅថ្ងៃនេះ។ ខ្ញុំក៏សូមអរគុណដល់ អ៊ីអនម៉ល ដែលបានយល់ដឹងពីអត្ថប្រយោជន៍នៃព្រឹត្តិការណ៍នេះផងដែរ»។
លោក ចេប៊ី ក៏ថ្លែងអំណរគុណផងដែរថា៖
«ជាចុងក្រោយខ្ញុំសូមអរគុណដល់ក្រុមការងាររបស់ខ្ញុំ ជាពិសេសគណៈកម្មាធិការរៀបចំកម្មវិធី សម្រាប់ការខិតខំរបស់ពួកគេដើម្បីរៀបចំព្រឹត្តិការណ៍នេះឡើង។ ខ្ញុំសង្ឃឹមថាអ្នកទាំងអស់គ្នានឹងមានភាពរីករាយក្នុងការចូលរួមព្រឹត្តិការណ៏កីឡា Decathlon Sports Festival លើកទី២នេះ»។
សូមបញ្ជាក់ថា ព្រឹត្តិការណ៍ Decathlon Sports Festival លើកទី២ នេះ មានមហាជនចូលរួមជាច្រើនហើយ ជាពិសេសនោះមានក្មេង និងយុវវ័យដែលស្រលាញ់កីឡាបានចូលរួមលេងកីឡាជាច្រើនប្រភេទយ៉ាងសប្បាយ។ លើកនេះ Decathlon Sports Festival បានដាក់កីឡា ១៦ ប្រភេទមានដូចជា ជិះកង់ ការបោះតង់ យូហ្គា វាយតេនីស រាំហ្សមបា ការ៉ាតេដូ កីឡាវាយសី ប្រដាល់សេរី តៃក្វាន់ដូ កីឡាបាល់បោះ វាយប៉េងប៉ុង រាំបាំបាឡេ កីឡាបាល់ទាត់ កីឡាប្រដាល់ និងកីឡាហែលទឹក។
Decathlon គឺជាក្រុមហ៊ុនកីឡាបារាំងមួយដែលបានបង្កើតឡើងនៅក្នុងឆ្នាំ ១៩៧៦ ហើយកំពុងប្រតិបត្តិការនៅក្នុង ៥០ ប្រទេស ទូទាំងពិភពលោកនាពេលបច្ចុប្បន្ននេះ។ គោលបំណងរបស់ Decathlon គឺដើម្បីផ្ដល់ជូននូវសម្ភារកីឡាដ៏សម្បូរបែបសម្រាប់អ្នកលេងកីឡាទាំងអស់នៅកម្ពុជា។
Decathlon បានមកដល់ប្រទេសកម្ពុជាតាំងពីឆ្នាំ ២០១១ ដោយបានចាប់ផ្ដើមធ្វើការផលិតសម្ភារកីឡានៅក្នុងប្រទេសកម្ពុជា ហើយនៅឆ្នាំ ២០១៨ បានចាប់ផ្ដើមការលក់រាយនូវសម្ភារកីឡាជាមួយនឹងគោលបំណង ដើម្បីផ្ដល់ភាពងាយស្រួលដល់ប្រជាពលរដ្ឋនៅក្នុងប្រទេសកម្ពុជាក្នុងការស្វែងរកសម្ភារកីឡាដែលពួកគេត្រូវការ។
Decathlon រចនា បង្កើត និងផលិត ហើយលក់ផលិតផលស្តង់ដារ ដែលមានគុណភាពខ្ពស់ជាមួយនឹងតម្លៃសមរម្យដែលអាចទទួលយកបាន ដែលមានកីឡាជាង ៥០ សម្រាប់អ្នកចាប់ផ្តើមដំបូង កីឡាករដែលមានបទពិសោធន៍ ឬអ្នកជំនាញ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]