រាជធានីភ្នំពេញ ៖ បុរសម្នាក់ខ្ចីរថយន្តមិត្តភក្តិម៉ាកព្រូស ហើយទុកចោលមុខផ្ទះមួយភ្លែតសោះ ក៏ស្រាប់តែចោរធ្វើសកម្មភាពលួចយកទៅបាត់ស្រមោល ហើយក៏បើកមើលឃើញតាមប្រព័ន្ធ GPS ទៅដល់ម្តុំផ្សារទំនប់ ប៉ុន្តែរកអត់ឃើញ បង្កឱ្យមានការភ្ញាក់ផ្អើលកាលពីម៉ោង5ល្ងាច ថ្ងៃទី6 ខែមិថុនា ឆ្នាំ២០១៩ តាមបណ្តោយផ្លូវ330 នៅចំណុចផ្ទះលេខ21 ស្ថិតនៅក្នុងសង្កាត់បឹងសាឡាង ខណ្ឌទួលគោក ។
តាមប្រភពពីជនរងគ្រោះសុំមិនបញ្ចេញឈ្មោះបានឱ្យដឹងថា មុនពេលកើតហេតុ គាត់បានខ្ចីរថយន្តរបស់មិត្តភក្តិម៉ាកតូយ៉ូតាព្រូស ពណ៌ស ពាក់ស្លាកលេខភ្នំពេញ 2AU8373 ជិះមកផ្ទះនៅចំណុចកើតហេតុ រួចចតរថយន្តទុកចោល ហើយភ្លេចសោរថយន្តនៅក្នុងរថយន្ត។
ភ្លាមៗនោះដែរ ក៏លេចមុខជនសង្ស័យម្នាក់មិនស្គាល់អត្តសញ្ញាណនោះទេ បានធ្វើសកម្មភាពលួចយករថយន្ត រួចរត់គេចខ្លួនបាត់ស្រមោល រហូតដល់ម៉ោង7យប់ស្រាប់តែជនរងគ្រោះបើកប្រព័ន្ធ GPS ទៅមើលឃើញលោតនៅចំណុចម្តុំផ្លូវ598 ផ្សារទំនប់ ក៏រត់ទៅប្តឹងនៅនគរបាលប៉ុស្តិ៍បឹងសាឡាង ឱ្យជួយអន្តរាគមន៍ ។
ខណៈពេលសមត្ថកិច្ចប៉ុស្តិ៍បឹងសាឡាង បានចុះទៅដល់កន្លែងកើតហេតុស្រាវជ្រាវនៅម្តុំដីវាល និងម្តុំផ្ទះប្រជាពលរដ្ឋ ប៉ុន្តែរកអត់ឃើញទេ ក៏ត្រឡប់ទៅវិញ ហើយជនរងគ្រោះបានទៅដាក់ពាក្យបណ្តឹងនៅប៉ុស្តិ៍បឹងសាឡាងតែម្តង ដើម្បីឱ្យសមត្ថកិច្ចតាមជួយស្រាវជ្រាវតាមចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
