អាហ្សេបៃហ្សង់៖ សហព័ន្ធបាល់ទាត់ទ្វីបអឺរ៉ុប UEFA កំពុងតែប្រឈមនឹងភាពអាម៉ាស់ មុនការប្រកួតវគ្គផ្តាច់ព្រ័ត្រ UEFA Europa League រវាងក្រុម Arsenal និង Chelsea ឈានចូលមកដល់នៅសប្តាហ៍ក្រោយ។ ភាពអាម៉ាស់នោះគឺ ការប្រកួតដ៏ធំនៃពានរង្វាន់លំដាប់ទី២របស់អឺរ៉ុបមួយនេះ អាចនឹងប្រកួតដោយមានកៅអីរាប់ពាន់នៅទំនេរចោល ដោយគ្មានទស្សនិកជនទស្សនាផ្ទាល់។
បើយោងតាមសារព័ត៌មាន The Time បានឱ្យដឹងថា ក្រុមហ៊ុនម្ចាស់ឧបត្ថម្ភមួយចំនួន បានធ្វើការបង្វែរសំបុត្រជាង ២,០០០សន្លឹកដែល UEFA បម្រុងទុករួចជាស្រេចប្រគល់ឱ្យត្រឡប់ទៅវិញ។ ហេតុផលសំខាន់បំផុតដែលពួកគេមិនអាចចូលរួមបាន គឺដោយសារតែបញ្ហាលំបាកមួយចំនួន ព្រមទាំងតម្លៃសំបុត្រធ្វើដំណើរទៅកាន់ប្រទេសអាហ្សេបៃហ្សង់មានតម្លៃខ្ពស់ពេក។ ដោយឡែក ក្លិបដែលបានឡើងទៅកាន់វគ្គផ្តាច់ព្រ័ត្រទាំងពីរ ក៏គ្រោងនឹងប្រគល់សំបុត្រជាង ៦,០០០សន្លឹកប្រគល់ត្រឡប់ទៅ UEFA វិញផងដែរ។
ដំបូងឡើយក្លិប Chelsea និង Arsenal មានគម្រោងតវ៉ាជាមួយ UEFA ដោយសារតែក្លិបទាំងពីរនេះ ទទួលបានសំបុត្រសម្រាប់លក់ទៅកាន់អ្នកគាំទ្រតិចតួចមែនទែន បើធៀបទៅនឹងកីឡដ្ឋានដែលផ្ទុកទស្សនិកជនបាន ៦៩,០០០នាក់នេះ។ ប៉ុន្តែក្រោយមក ក្លិបក៏បានប្តូរចិត្តវិញ ដោយសារតែអ្នកគាំទ្រមានការពិបាកពីបញ្ហានៃការចំណាយខ្ពស់ ដើម្បីហោះទៅទស្សនាការប្រកួត។ ដោយឡែក សម្រាប់ដៃគូឧបត្ថម្ភមួយចំនួនដែលត្រូវចូលរួមក៏បានឱ្យដឹងថា ពួកគេក៏ជួបបញ្ហាជាច្រើនសម្រាប់ទិដ្ឋការ និងពេលវេលាប្រកួតនៅម៉ោង ១១យប់ក៏ជាបញ្ហាសម្រាប់ពួកគេផងដែរ។
យ៉ាងណាក្តី សំបុត្រដែលនៅសល់នេះ គឺនឹងត្រូវដាក់លក់សម្រាប់អ្នកគាំទ្រក្នុងប្រទេសអាហ្សេបៃហ្សង់វិញ បើទោះបីជាមិនទាន់ប្រាកដថាសំបុត្រនឹងត្រូវលក់អស់ឬយ៉ាងណា? ដោយសារតែ UEFA ដាក់លក់សំបុត្របានជាង ២៣,០០០សន្លឹករួចហើយ ដែលមានន័យថាកៅអីរាប់ពាន់អាចនឹងនៅសល់ទំនេរចោលអំឡុងការប្រកួតនេះ។
ក្នុងការប្រកួតវគ្គផ្តាច់ព្រ័ត្រនេះដែរ អ្នកគាំទ្ររបស់ Arsenal មានការខឹងសម្បារយ៉ាងខ្លាំងចំពោះ UEFA ដែលបានសម្រេចយកកីឡដ្ឋាននៅទីក្រុង Baku ធ្វើជាកន្លែងប្រកួតផ្តាច់ព្រ័ត្រ ដែលនាំឱ្យអវត្តមានកីឡាករសំខាន់មួយរូបរបស់ពួកគេគឺ Henrikh Mkhitaryan ដោយសារតែបារម្ភពីបញ្ហាសុវត្ថិភាព។ បើតាមសារព័ត៌មាន Sportmail បានបង្ហើបថា UEFA បានត្រៀមរួចជាស្រេចដើម្បីបង្ការការតវ៉ាណាមួយដែលកើតឡើងដោយអ្នកគាំទ្ររបស់ Arsenal ចំពោះបញ្ហាខាងលើនេះ។ បដាដែលប្រឆាំងនឹង UEFA ត្រូវបានហាមឃាត់ក្នុងបរិវេណកីឡដ្ឋាន រួមទាំងតាមដានយ៉ាងដិតដល់ចំពោះសំឡេងស្រែកហ៊ោររបស់អ្នកគាំទ្រក្រុម Arsenal ផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]