ចិន៖ នារីជាអ្នករត់តុជនជាតិចិនម្នាក់ បានរងរបួសយ៉ាងដំណំ ក្រោយជួបរឿងស៊យធំផ្ទុះឆ្នាំងស៊ុប រលាកពេញផ្ទៃមុខ និងត្រូវបានបញ្ជូនទៅសង្គ្រោះនៅមន្ទីរពេទ្យ។
ហេតុការណ៍មួយនេះ បានកើតឡើងកាលពីយប់រំលងអធ្រាត្រ ថ្ងៃទី១៥ ឧសភា ឆ្នាំ២០១៩ កន្លងទៅនេះ ស្ថិតនៅក្នុងទីតាំងភោជនីយដ្ឋាន Haidilao ទីក្រុង Kunming ខេត្ត Yunnan ប្រទេសចិន។
បើយោងតាមប្រព័ន្ធផ្សព្វផ្សាយក្នុងស្រុក បានរាយការណ៍ឲ្យដឹងថា នៅក្នុងថ្ងៃកើតហេតុនោះ តុភ្ញៀវដែលបានចូលមកហូបស៊ុប ធ្វេសប្រហែសបានធ្វើធ្លាក់ដែកកេះចូលទៅក្នុងឆ្នាំងស៊ុប។ ក្រោយមកបុគ្គលិកក្នុងហាង ពោលគឺនារីរងគ្រោះដែលជាអ្នករត់តុម្នាក់ ក៏បានមកជួយស្រង់យកដែកកេះនោះចេញពីឆ្នាំងស៊ុប។ ប៉ុន្តែសំណាងមិនល្អ ដោយសារតែកម្ដៅក្តៅខ្លាំង ទើបបណ្តាលឲ្យដែកកេះក្នុងឆ្នាំងស៊ុបផ្ទុះតែម្តង រហូតខ្ទាតជះទឹកស៊ុបដាក់ពេញមុខអ្នករត់តុស្រីនោះ និងត្រូវភ្ញៀវដែលអង្គុយនៅនឹងតុកើតហេតុនោះផងដែរ។
ភ្លាមៗក្រោយកើតហេតុ នារីរងគ្រោះជាអ្នករត់តុ រួមនឹងភ្ញៀវបុរសប៉ុន្មាននាក់នោះ ក៏ត្រូវបានបញ្ជូនទៅសង្គ្រោះនៅមន្ទីរពេទ្យ ដើម្បីទទួលការព្យាបាលផងដែរ។
បើតាមការឲ្យដឹងពីអ្នកនាំពាក្យម្នាក់ ពីខាងភោជនីយដ្ឋានខាងលើនេះ បានបញ្ជាក់ថា នៅក្នុងថ្ងៃកើតហេតុនោះ គឺភ្ញៀវម្នាក់ដែលនៅតុកើតហេតុនោះ បានហុចដែកកេះឲ្យមិត្តរបស់គាត់ ប៉ុន្តែចៃដន្យក៏ធ្លាក់ចូលទៅក្នុងទឹកឆ្នាំងស៊ុបដែលកំពុងពុះ។ ហើយនារីរត់តុក៏បានមកជួយស្រង់ ប៉ុន្តែដោយសារក្តៅពេកទើបវាផ្ទុះតែម្តង។
ភ្ញៀវរងគ្រោះត្រូវបានគេរាយការណ៍ថា បានរងរបួសស្រាល រលាកដៃបន្តិចបន្តួចប៉ុណ្ណោះ ខណៈឯនារីរត់តុរងគ្រោះវិញ បានរងរបួសរលាកលើផ្ទៃមុខយ៉ាងដំណំ។ ប៉ុន្តែមកទល់ពេលនេះ ស្ថានភាពរបស់នាងក៏បានធូរស្បើយជាងមុនផងដែរ។
គួរឲ្យដឹងផងដែរថា បើទោះបីជាយ៉ាងណាក្តី ជុំវិញនឹងករណីនេះ ប្រភពបានឲ្យដឹងថា ក៏កំពុងតែស្ថិតនៅក្រោមការស៊ើបអង្កេតបន្ថែមផងដែរ។
យ៉ាងណាមិញ នេះក៏ជាសារមួយជួយក្រើនរម្លឹកដល់សាធារណៈទាំងឡាយ ឲ្យបង្កើនការប្រុងប្រយ័ត្នឲ្យបានខ្ពស់បំផុត នៅរាល់ពេលចូលញ៉ាំអាហារក្នុងភោជនីយដ្ឋាននានា ឬនៅផ្ទះជាដើម។ ជាក់ស្តែង ដូចជាការញ៉ាំស៊ុបនេះតែម្តង ដែលភ្លើងចង្ក្រានហ្គាស់ត្រូវបើកជាប់ជានិច្ច ដូច្នេះវាអាចនឹងងាយរងហានិភ័យបំផុត ដូចជាការឆាបឆេះ ឬផ្ទុះជាដើម។ គិតគូរពីសុវត្ថិភាពខ្លួនឯង គប្បីត្រូវមានការប្រុងប្រយ័ត្នខ្ពស់៕
ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]