រញ៉េរញ៉ៃច្រើនពេក! ពេលនេះ PSG ចេញមុខមកប្រកាសជាផ្លូវការពីអនាគតរបស់ Mbappe

បារាំង៖ មួយរយៈពេលចុងក្រោយនេះ មានសារព័ត៌មានល្បីៗជាច្រើនបានចុះផ្សាយថា Kylian Mbappe អាចនឹងធ្វើការចាកចេញពីក្លិប Paris Saint-Germain នារដូវក្តៅខាងមុខនេះ។ ជាក់ស្តែង ក្រោយពេលទទួលបានពានរង្វាន់ជាកីឡាករល្អបំផុតប្រចាំឆ្នាំនៅ Ligue1 កីឡាករវ័យ ២០ឆ្នាំរូបនេះបាននិយាយថា “នេះជាពេលវេលាដែលគេត្រូវមានការទទួលខុសត្រូវច្រើនជាងមុនហើយ”។ Mbappe បានបន្ថែមថា៖ “ខ្ញុំមានភាពរីករាយនៅទឹកដីប៉ារីស តែប្រហែលកន្លែងផ្សេងក៏ដូចគ្នា”។

គួររម្លឹកថា Mbappe ត្រូវបានគេជឿជាក់ថា អាចនឹងចាកចេញទៅចូលរួមជាមួយក្លិបធំមួយនារដូវក្តៅនេះ ដូចជាក្លិប Real Madrid ឬ FC Barcelona ជាដើម។ ប៉ុន្តែយ៉ាងណាមិញ ក្លិប Paris Saint-Germain បានចេញមកប្រកាសនៅលើបណ្តាញសង្គម Twitter របស់ខ្លួនជាផ្លូវការថា Kylian Mbappe នឹងបន្តអាជីពនៅលីគកំពូលបារាំងជាបន្ត ដោយមិនចាកចេញទៅណាឡើយ។ 

ក្លិប PSG បានចេញសេចក្តីប្រកាសថា៖ “ Mbappe និងក្លិប PSG មានទំនាក់ទំនងយ៉ាងខ្លាំងក្លាក្នុងរយៈពេល ២ឆ្នាំចុងក្រោយនេះ ហើយប្រវត្តិសាស្រ្តនេះនឹងត្រូវបន្តនារដូវកាលក្រោយទៀត។ ជាមួយមហិច្ឆតាក្នុងការកត់សម្គាល់ប្រវត្តិសាស្ត្របាល់ទាត់ និងខួប ៥០ឆ្នាំរបស់ក្លិប ប្រវត្តិសាស្ត្រដ៏អស្ចារ្យមួយនឹងត្រូវបង្កើតឡើង ហើយកីឡាករកំពូលៗនឹងក្លាយជាផ្នែកមួយនៃរឿងនេះ អមដោយស្មារតីជាក្រុមតែមួយ”៕