ស្វាក្រហមពូជ Orangutan ត្រូវបានរំពឹងថា នឹងផុតពូជក្នុងពេល ១០ឆ្នាំខាងមុខ បើនៅតែបន្តបំផ្លិចបំផ្លាញព្រៃឈើបែបនេះទៀត

បរទេស៖ ពួកយើងត្រូវតែរួមគ្នាធ្វើអ្វីមួយ បើមិនដូច្នេះទេសត្វស្វាក្រហមពូជ Orangutan ច្បាស់ជាផុតពូជនៅនៅថ្ងៃអនាគតជាក់ជាពុំខាន។

យោងតាមលោក Alan Knight ប្រធានប្រតិបត្តិនៃអង្គការសង្គ្រោះសត្វព្រៃអន្តរជាតិ បានព្រមានថា សត្វស្វាក្រហមពូជ Orangutan នាពេលបច្ចុប្បន្ននេះ កំពុងតែស្ថិតក្រោមការគំរាមកំហែងនិងជិតផុតពូជហើយ។ 

«ប្រសិនបើការបំផ្លិចបំផ្លាញព្រៃឈើនៅតែបន្តទៀត អីចឹងខ្ញុំគ្មានសង្ឃឹមថាពូជស្វា Orangutan អាចនៅមានជីវិតរស់នៅក្នុងព្រៃបានទៀតទេ។» (សម្តីរបស់លោក Alan)

លោកបានព្យាករណ៍ថាស្វាក្រហមពូជ Orangutan នឹងផុតពូជអស់ក្នុងរយៈពេល ១០ឆ្នាំខាងមុខទៀត។

«ខ្ញុំគិតថាប្រហែលជា ១០ឆ្នាំទៀត វានឹងផុតពូជអស់ហើយ ប្រសិនបើមិនបញ្ឈប់សកម្មភាពបំផ្លិចបំផ្លាញព្រៃឈើបែបនេះទៀត។ ហើយវាអាចនឹងផុតពូជមុនហ្នឹងទៀតក៏ថាបានដែរ បើយើងមិនមានវិធានការដោះស្រាយបញ្ហានេះឱ្យបានឆាប់។» (សម្តីរបស់លោក Alan) 

គួរឱ្យដឹងផងដែរថា សត្វស្វាក្រហមពូជ Orangutan កំពុងស្ថិតនៅក្នុងបញ្ជីសត្វព្រៃ ដែលជិតផុតពូជ ដែលក្នុងនោះក៏រួមមាន សត្វខ្លាម៉ាឡាយ៉ាន រមាសស៊ូម៉ាត្រា ពង្រូលម៉ាឡាយ៉ាន និងសត្វព្រៃកម្រដទៃទៀត។

តើអ្នកណាជាអ្នកទទួលខុសត្រូវ និងគួរតែស្តីបន្ទាសនោះ? ច្បាស់ជាមនុស្សលោកយើងហើយ!

យោងតាមរបាយការណ៍របស់អង្គការសហភាពអន្តរជាតិដើម្បីការអភិរក្សធម្មជាតិ(IUCN)បានបង្ហាញថា៖

«ព្រៃឈើដែលជាទីជម្រករបស់សត្វស្វាក្រហមពូជ Orangutan កំពុងតែរស់នៅនោះ ត្រូវបានពួកមនុស្សឈូសឆាយ ប្រែក្លាយទៅជាចម្ការដូងប្រេង ចម្ការកៅស៊ូអស់ហើយ ហើយពួកវាមួយចំនួនក៏ត្រូវបានពួកមនុស្សសម្លាប់ចោលដែរ។»

«ស្វាក្រហមពូជ Orangutan ត្រូវបានមនុស្សប្រមាញ់ សម្លាប់ និងបណ្តេញចេញពីទីជម្រកយ៉ាងច្រើនគួរឱ្យកត់សម្គាល់។ មិនយូរទេ ពួកវាច្បាស់ជាផុតពូជអស់ ហើយយើងក៏មិនអាចស្រោចស្រង់វាបានដែរ។»

ដូច្នេះប្រសិនយើងនៅតែបន្តបំផ្លិចបំផ្លាញព្រៃឈើទៀត សត្វស្វាក្រហមពូជ Orangutan នឹងមិនមាននៅលើលោកនេះទៀតទេ ហើយវាគ្រាន់តែជាចំណែកមួយនៃប្រវត្តិសាស្រ្ត ដែលពួកវាធ្លាប់មាននៅលើលោកនេះតែប៉ុណ្ណោះ។

ហេតុដូចនេះ យើងទាំងអស់គ្នាគួរតែរួមគ្នាថែរក្សានិងការពារព្រៃឈើដើម្បីធានាថា ស្វាក្រហមពូជ Orangutan នេះអាចនៅមាននៅលើលោកនេះ ហើយអាចបន្តឱ្យក្មេងជំនាន់ក្រោយបានមើលឃើញពួកវាទៀត៕