កញ្ញា ហុង ស្រីពេជ្រ ដែលអ្នកទាំងអស់គ្នាស្គាល់ថាជា Mina ដែលជាតារាពហុជំនាញ ជាអ្នកចម្រៀង POP អ្នកនិពន្ធ និងជាតារាសម្ដែង នៅក្រោមផលិតកម្ម K’ve Entertainment។ កាលពីថ្ងៃទី ៣០ តុលា ២០២៦នេះកញ្ញា ទើបតែបញ្ចេញនូវ MV បទចម្រៀងថ្មី ដែលមានចំណងជើងថា “Slay”​ រួមជាមួយស្ទីលចម្រៀងបែបថ្មីបែប K-POP កន្រ្តាក់អារម្មណ៍ ក្បាច់រាំយ៉ាងរស់រវើក ការតុបតែងខ្លួនយ៉ាងទាន់សម័យនិងទាក់ទាញប្លែកភ្នែក ព្រមទាំងអត្ថន័យនៃបទចម្រៀងយ៉ាង slay ដូចចំណងជើង។

ដូចដែលអ្នកទាំងអស់គ្នាបានស្ដាប់កន្លងមកនៅបទល្បីៗរបស់កញ្ញាមានដូចជា  “Love calling“ , “Tipsy“ និង “ម្ដងទៀតបានទេ”  ដែលសុទ្ធសឹងជាស្នាដៃនិពន្ធទំនុកច្រៀងដោយកញ្ញាផ្ទាល់។

អត្ថន័យចម្រៀងពីមួយបទទៅមួយបទ មានភាពទាក់ទាញខុសប្លែកពីគ្នាគួរអោយចាប់អារម្មណ៍។

ចំណែកការសម្ដែងនៅក្នុងវីដេអូចម្រៀងនោះទៀតសោតគឺកញ្ញាបង្ហាញពីអារម្មណ៍ឈឺចាប់និងភាពក្រមិចក្រមើម បានយ៉ាងល្អទៅតាមអត្ថន័យនៃចម្រៀងនិមួយៗ។

កន្លងមកយើងក៏ធ្លាប់ឃើញកញ្ញាបង្ហាញខ្លួននៅក្នុងរឿងខ្លីៗ និងស្ពតពាណិជ្ជកម្មជាច្រើនផងដែរ។

មិនត្រឹមតែប៉ុណ្ណោះ មួយខែកន្លងទៅនេះកញ្ញាក៏បានបង្ហាញខ្លួននៅក្នុងខ្សែភាពយន្តបែបរន្ធត់មួយ ដែលមានចំណងជើងថា “កុំសន្យា” ដែលជាបទពិសោធន៍ថ្មីមួយទៀតសម្រាប់កញ្ញាផងដែរ។​

យ៉ាងណាមិញកញ្ញានៅតែសម្តែងបានយ៉ាងល្អឥតខ្ចោះក្នុងភាពយន្ដនោះ។