អបអរសាទរ! ព័រទុយកាល់ ក្លាយជាជើងឯក Nations League ក្រោយបំបាក់អេស្ប៉ាញ បាល់ប៉េណាល់ទី

កីឡា៖ កាលពីយប់ឈានចូលថ្ងៃទី ៩ខែមិថុនា កន្លងទៅនេះ ក្រុមជម្រើសជាតិព័រទុយកាល់ បានក្លាយជាម្ចាស់ជើងឯកពានរង្វាន់ UEFA Nations League បន្ទាប់ពីបានយកឈ្នះ គោជល់អេស្ប៉ាញ នាវគ្គផ្ដាច់ព្រ័ត្ររួចមក។

ការប្រកួតវគ្គផ្ដាច់ព្រ័ត្រដ៏ស្វិតស្វាញនេះធ្វើឡើងនាទីក្រុង Munich ប្រទេសអាល្លឺម៉ង់ គឺនៅកីឡដ្ឋាន Allianz Arena ដោយចប់ម៉ោងប្រកួត ក្រុមទាំងពីរស្មើគ្នាក្នុងលទ្ធផល ២ ទល់នឹង២ ដោយអេស្ប៉ាញជាអ្នកបើកឆាករកគ្រាប់បាល់ដោយ Martin Zubimendi នៅនាទីទី ២១ តែ Nuno Mendes រកបាន១គ្រាប់ឲ្យព័រទុយកាល់តាមស្មើវិញ នានាទីទី ២៦ ។

បន្ទាប់មក Mikel Oyarzabal រកបាន១គ្រាប់ឲ្យអេស្ប៉ាញនាំមុខនានាទីទី៤៥ តែព័រទុយកាល់ស៊ុតតាមស្មើដោយប្រធានក្រុមឆ្នើម Cristiano Ronaldo នៅនាទីទី៦១។ដោយសារក្រុមទាំងពីរស្មើគ្នា ២ ទល់នឹង២ នៅម៉ោងប្រកួតផ្លូវការ ទើបឈានដល់វគ្គកាត់សេចក្ដីដោយបាល់ពិន័យ១១ម៉ែត្រ ជាលទ្ធផល ព័រទុយកាល់ យកឈ្នះអេស្ប៉ាញ នៅបាល់កាត់សេចក្ដី១១ម៉ែត្រ ៥ ទល់នឹង ៣ ។

ជ័យជម្នះនេះបានធ្វើឲ្យព័រទុយកាល់ក្លាយជាម្ចាស់ជើងឯក Nations League ឆ្នាំ២០២៥ ដែលជាលើកទីពីរហើយក្នុងប្រវត្តិសាស្ត្ររបស់ក្រុមជម្រើសជាតិមួយនេះ៕