កូរ៉ខាងត្បូង៖ តារាចម្រៀង និងជាតារាសម្តែងស្រី Seohyun សមាជិកកូនពៅនៃក្រុម Girl’s Generation ទីបំផុតនាងបានទទួលសម្តែងខ្សែភាពយន្តថ្មីមួយ ដែលជាខ្សែភាពយន្តប្រភេទស្នេហា ស្រីស្រលាញ់ស្រីដូចគ្នា ជាលើកដំបូងចំណងជើងថា «Hello Dracula» របស់ស្ថានីយ៍ទូរទស្សន៍ JTBC។

តួយ៉ាង នៅក្នុងខ្សែភាពយន្តនេះ Seohyun បានដើរជាតួអង្គ Anna ជាកូនស្រីទោលក្នុងគ្រួសារ ពោលគឺនាងរស់នៅតែ២នាក់ម្តាយរបស់នាងតែប៉ុណ្ណោះ នាងមានមុខនាទីជាគ្រូសាលាបឋមសិក្សា នាងតែងតែបង្ហាញឲ្យម្តាយនាងឃើញថា នាងគឺជាកូនស្រីម្នាក់ដែលរឹងមាំម្នាក់ ផ្តល់ទំនុកចិត្តដល់ម្តាយ និងស្រលាញ់ម្តាយបំផុតលើលោក ដែលវាធ្វើឲ្យនាងមិនហ៊ានប្រាប់អាថ៌កំបាំងនូវមួយ ដែលនាងបានលាក់ទុកក្នុងចិត្តតែម្នាក់ឯងរហូតមក នោះគឺនាងជាមនុស្សដែលស្រលាញ់ស្រីដូចគ្នា។

គួរឲ្យដឹងថា ខ្សែភាពយន្តដ៏ថ្មីសន្លាង «Hello Dracula» នេះ Seohyun បានសម្តែងជាមួយនឹង តារាសម្តែងស្រីល្បីឈ្មោះ Lee Chung Ah ។ លើសពីនេះ Seohyun បានលើកឡើងថា នាងបានសម្តែងខ្សែភាពយន្តមួយនេះ ទុកជាកាដូមួយសម្រាប់អ្នកគាំទ្ររបស់នាង ហើយនាងក៏សង្ឃឹមថាគ្រប់គ្នានឹងពេញចិត្តផងដែរ។

គួរបញ្ជាក់ថា ខ្សែភាពយន្តមួយនេះ នឹងចាក់ផ្សាយជាផ្លូវការនៅថ្ងៃទី១៧ និង១៨ ខែកុម្ភៈ វេលាម៉ោង ៩:៣០យប់ នៅលើកញ្ចក់ទូរទស្សន៍ JTBC ខាងមុខនេះហើយ៕