Pep អាចនឹងលុបចោលកុងត្រា រវាងលោកជាមួយ Man City ដើម្បីធ្វើរឿងមួយនេះ

អង់គ្លេស៖ បើតាមសេចក្ដីរាយការណ៍បានឲ្យដឹងថា លោក Pep Guardiola អាចនឹងលុបចោលកុងត្រារបស់លោកជាមួយក្លិប Manchester City ដើម្បីចាកចេញពីតំណែងជាអ្នកចាត់ការទូទៅនៅបំណាច់រដូវកាល ២០១៩-២០២០។

អ្នកចាត់ការទូទៅមានដើមកំណើតមកពីតំបន់កាតាឡាន់រូបនេះបានចូលខ្លួនមកដឹកនាំ Man City កាលពីឆ្នាំ២០១៦ ដោយជួយឲ្យមេឃខៀវឈ្នះការប្រកួតចំនួន១៤៣ ក្នុងចំណោមការប្រកួតសរុប១៩៩ និងបានជួយឲ្យឈ្នះពាន Premier League ២ដង, FA Cup ១ដង និង League Cups ២ដង។

បច្ចុប្បន្ន Man City មានគម្លាតដល់ទៅ១៤ពិន្ទុពីក្រុមលេខ១ Liverpool ក្នុងតារាងចំណាត់ថ្នាក់ក្របខណ្ឌ Premier League ខណៈប៉ុន្មានសប្ដាហ៍ចុងក្រោយនេះក្រុមរបស់លោក Pep ធ្វើមិនសូវជាបានល្អនោះទេ។

បើតាមការចុះផ្សាយរបស់សារព័ត៌មានកីឡាធំមួយក្នុងប្រទេសអង់គ្លេស  កិច្ចសន្យារវាងលោក Pep និងក្លិប Man City គឺអ្នកចាត់ការទូទៅរូបនេះអាចដើរចេញពីតំណែងគ្រប់ពេលវេលាដែលលោកចង់។ យ៉ាងណាមិញ ក្លិបជើងឯកអង់គ្លេសរដូវកាលមុនមួយនេះហាក់មិនមានការព្រួយបារម្ភនោះទេ ដោយជឿថាអ្នកចាត់ការទូទៅវ័យ៤៨ឆ្នាំរូបនេះនឹងនៅបន្តការងាររបស់ខ្លួនរហូតដល់បញ្ចប់កុងត្រានៅរដូវក្ដៅ ឆ្នាំ២០២១។

គួរឲ្យដឹងដែរថា កាលពីថ្ងៃអាទិត្យសប្ដាហ៍មុន Manchester City បានបាត់បង់ ៣ពិន្ទុបន្ទាប់ពីប្រកួតចាញ់ក្រុមភ្ញៀវ Manchester United ដោយលទ្ធផល ១ទល់នឹង២ នៅក្នុងការប្រកួតក្របខណ្ឌ Premier League សប្ដាហ៍ទី១៦ ៕

ប្រភព៖ SportsMole