ប្រភេទកីឡាខ្លះនៅស៊ីហ្គេមត្រូវពន្យារពេលប្រកួត ដោយសារតែបញ្ហាព្យុះនៅប្រទេសហ្វីលីពីន

ហ្វីលីពីន៖ បើតាមទំព័រផ្លូវការរបស់ Cambodia SEA GAMES 2023 ឯកឧត្តម វ៉ាត់ ចំរើន អគ្គលេខាធិការ NOCC និងជាប្រធានបេសកកម្មស៊ីហ្គេមកម្ពុជា បានឲ្យដឹងថាបើតាមម្ចាស់ផ្ទះជូនដំណឹង ព្យុះមានភ្លៀងនឹងមកដល់ទីក្រុង Clark និង Manila នៅថ្ងៃអង្គារ៍នេះ។

ដូច្នេះមានប្រភេទកីឡាខ្លះត្រូវបានលើកពេលប្រកួត ឬត្រូវពន្យារពេលនៃការប្រកួតដើម្បីរក្សាសុវត្ថិភាព។ ឯកឧត្តម វ៉ាត់ ចំរើន ក៏បានជម្រាបដល់កីឡាករកម្ពុជាទាំងអស់ឲ្យមានការប្រុងប្រយ័ត្នខ្ពស់ ពេលដើរចេញក្រៅ ឬជ្រកក្រោមដើមឈើ។ ឯកឧត្តមក៏បានស្នើឲ្យក្រុមកីឡាករកម្ពុជាទាំងអស់តាមដានព័ត៌មានជាមួយគណៈកម្មការរៀបចំការប្រកួតតាមប្រភេទកីឡានីមួយៗ បើមានការប្រែប្រួល សូមផ្តល់ដំណឹងតាមក្រុមនេះជាប្រញាប់។

ព្រឹត្តិការណ៍កីឡាស៊ីហ្គេមលើកទី៣០ នៅប្រទេសហ្វីលីពីន បានចាប់ផ្ដើមការប្រកួតរយៈពេល ៣ថ្ងៃហើយ ដោយគិតត្រឹមម៉ោង ១២:៣០នាទីរសៀលថ្ងៃទី០៣ ខែធ្នូនេះ កម្ពុជា កំពុងឈរនៅចំណាត់ថ្នាក់លេខ៨ ក្នុងតារាងមេដាយ ដោយឈ្នះមេដាយសរុប១៩ ក្នុងនោះមានមាស១, ប្រាក់៣ និងសំរឹទ្ធ១៥៕