ក្រោយចាញ់ Liverpool កាលពីថ្ងៃអាទិត្យលោក Pep ត្រៀមជះលុយ ១០០លាននៅទីផ្សារខែមករា

អង់គ្លេស៖ មេឃខៀវ Manchester City ត្រៀមចំណាយកញ្ចប់ថវិកា ១០០លានផោននៅទីផ្សារខែមករាខាងមុខ ដើម្បីពង្រឹងក្រុមក្នុងការប្រជែងជាមួយ Liverpool ដើម្បីរក្សានិងការពារដំណែងជើងឯក Premier League នៅរដូវកាលនេះ។

ក្រោយចាញ់ Liverpool ដោយលទ្ធផល ៣ទល់នឹង១ នៅកីឡដ្ឋន Anfield កាលពីថ្ងៃអាទិត្យបានធ្វើឲ្យ Manchester City ស្ថិតនៅពីក្រោមពិន្ទុក្រុមរបស់លោក Klopp រហូតដល់ ៩ពិន្ទុ ខណៈហង្សក្រហមបានបន្តភាពមិនទាន់ចាញ់នៅផ្ទះរបស់ខ្លួនក្នុងការប្រកួតក្របខណ្ឌ Premier League តាំងពីខែមេសា ឆ្នាំ២០១៧។

ក្លិបមានមូលដ្ឋាននៅទីក្រុង Manchester បានមានបញ្ហានៅតំបន់ការពារក្រោយការចាកចេញរបស់ប្រធានក្រុម Vincent Kompany កាលពីរដូវក្ដៅ ខណៈខ្សែការពារឆ្នើម Aymeric Laporte ក៏មានរបួសជង្គង់តាំងពីខែសីហា។

បើតាមប្រភពពីក្នុងប្រទេសអង់គ្លេសបានឲ្យដឹងថាលោក Pep Guardiola បានត្រៀមលុយ ១០០លានផោនដើម្បីនាំចូលកីឡាករបន្ថែមនៅទីផ្សារខែមករាខាងមុខ ដើម្បីជាចលករក្នុងការប្រជែងពាន Premier League ជាមួយ Liverpool នៅរដូវកាលនេះ។

ក្រៅពីរំពឹងក្នុងការនាំចូលខ្សែការពារកណ្ដាល អ្នកចាត់ការទូទៅសញ្ជាតិអេស្ប៉ាញរូបនេះក៏នឹងសម្លឹងមើលការនាំចូលកីឡាករដើម្បីមកជំនួសកន្លែងរបស់ David Sivla និង Sergio Aguero ផងដែរ។

គួរឲ្យដឹងដែរថា ចំពោះគោលដៅចម្បងរបស់លោក Pep Guardiola ក្នុងការនាំចួលមកកាន់កីឡដ្ឋាន Etihad នៅទីផ្សារខែមករាខាងមុខនេះ គឺខ្សែបម្រើប្រយុទ្ធជម្រើសជាតិអេស្ប៉ាញរបស់ Real Madrid កីឡាករ Isco៕

ប្រភព៖ SportsMole