ព្រោះតែក្តីស្រមៃចង់ធ្វើជាអ្នកបើកយន្តហោះពេក ក៏បែកគំនិតបន្លំខ្លួនធ្វើពីឡុត ចុងក្រោយត្រូវចាប់ខ្លួន

ឥណ្ឌូនេស៊ី៖ កាលពីថ្ងៃសុក្រ ទី២២ ខែមីនា ឆ្នាំ២០១៩កន្លងទៅ បុរសម្នាក់ត្រូវបានចាប់ខ្លួននៅអាកាសយានដ្ឋានអន្តរជាតិ Soekarno-Hatta បន្ទាប់ពីបន្លំខ្លួនធ្វើពុតជាអ្នកបើកយន្តហោះសម្រាប់ក្រុមហ៊ុនអាកាសចរណ៍ Garuda Indonesia។

តាមប្រភពព័ត៌មានបានឱ្យដឹងថា នៅថ្ងៃកើតហេតុ ជនសង្ស័យមានឈ្មោះ Alvin Adithya Darmawan បានពាក់ឯកសណ្ឋានពីឡុតរបស់ក្រុមហ៊ុនអាកាសចរណ៍ Garuda Indonesia និងបានពាក់កាតសម្គាល់ខ្លួនថែមទៀតដើម្បីបន្លំខ្លួនធ្វើជាអ្នកបើកយន្តហោះ។ ក្រោយមកគេក៏បានឆ្លងកាត់កន្លែងត្រួតពិនិត្យនៅវេលាម៉ោងប្រមាណ ១១:៤០នាទីព្រឹក។ 

ក្រោយមកគេក៏បានជួបនឹងពីឡុតពិតប្រាកដម្នាក់ឈ្មោះ Andre។ លោក Andre បានឃើញគេដើរចុះដើរឡើងនៅជុំវិញស្ថានីយ ក៏មានការសង្ស័យ ក៏ទៅសួរនាំគេលេង ស្រាប់តែជនសង្ស័យមិនអាចឆ្លើយនូវសំណួររបស់លោក Andre បានសោះ។ ដូច្នេះលោកក៏បានហៅសន្តិសុខមកភ្លាមៗ។ ឆ្លងកាត់ការសួរចម្លើយរបស់សន្តិសុខបានឱ្យដឹងថា ការពិតរូបគេគឺជាអ្នកដំណើរម្នាក់ ហោះហើរទៅទីក្រុង Semarang ហើយក្តីសុបិនរបស់គេចង់ធ្វើជាអ្នកបើកយន្តហោះ។

«នៅពេលរៀនចប់វិទ្យាល័យ គេបានប្រលងនៅសាលារៀនបើកយន្តហោះ ប៉ុន្តែប្រលងធ្លាក់ ដូច្នេះក៏បែកគំនិតបន្លំខ្លួនធ្វើជាអ្នកបើកយន្តហោះយកតែម្តង។» (សម្តីរបស់សមត្ថកិច្ច) 

យ៉ាងណាមិញ រូបគេត្រូវបានចាប់ខ្លួន និងយកទៅដោះស្រាយទៅតាមនិតិវិធីច្បាប់។ ការតាំងចិត្តចង់ធ្វើជាអ្នកបើកយន្តហោះគឺមិនខុសនោះទេ ប៉ុន្តែការបន្លំខ្លួនទេ ទើបខុសនោះ។ ប្រសិនបើអ្នកមានក្តីសុបិនចង់ធ្វើជាអ្នកបើកយន្តហោះពិតមែន ហើយប្រសិនបើប្រលងធ្លាក់ អ្នកអាចព្យាយាមសាកល្បងប្រលងបានម្តងទៀត។ សូមកុំព្យាយាមបន្លំខ្លួនធ្វើបែបនេះឱ្យសោះ៕