រាជធានីភ្នំពេញ ៖ យុវជនពីរនាក់បានស្លាប់ជាបន្តបន្ទាប់នៅតាមផ្លូវខណៈបញ្ជូនតាម រថយន្តសង្គ្រោះទៅកាន់មន្ទីរពេទ្យក្រោយពីជួបគ្រោះថ្នាក់ ចរាចរណ៍ដោយរថយន្តម៉ាកឡិចស៊ីសអ៊ែរអ៊ិច៣០០បុកគ្នាជាមួយ ម៉ូតូអូសជិត២០ម៉ែត្រនៅចំណុចកែងមហាវិថីព្រះនរោត្តម និងផ្លូវលេខ១១៥ ស្ថិតក្នុងសង្កាត់ផ្សារកណ្តាលទី២ ខណ្ឌដូនពេញ កាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី២០ មីនា ២០១២។
ប្រភពព័ត៌មាននៅកន្លែងកើតហេតុបានឲ្យដឹងថា នៅវេលាម៉ោងខាងលើមានម៉ូតូមួយគ្រឿងម៉ាកគុបជ្រុងសេ៩០ បើកតាមផ្លូវលេខ១៥៤ ឆ្ពោះទៅទិសខាងលិច លុះដល់ផ្លូវកែងមហាវិថីព្រះនរោត្តម ម៉ូតូក៏បើកឆ្លងផ្លូវ ស្របពេលនោះមានរថយន្តមួយគ្រឿងម៉ាកឡិចស៊ីសស៊េរីអ៊ែរអ៊ិច៣០០ មិនចាំពណ៌ បើកតាមមហាវិថីព្រះនរោត្តមពីត្បូងទៅជើងក្នុងល្បឿនលឿនបានបុកគ្នាជា មួយនឹងម៉ូតូពេញទំហឹង ហើយអូសម៉ូតូ និងមនុស្សជិតម្ភៃម៉ែត្រ។ នៅពេលបុកមូ៉តូអូសជិត២០មែ៉ត្រ បណ្តាលឲ្យម៉ូតូខ្ទាតចេញពីកាងខាងមុខរថយន្ត ចំណែកមនុស្សបានខ្ទាតទៅម្ខាងផ្លូវដេក រដូករណែលឈាមហូរជោកខ្លួន រួចរថយន្តបានបន្ថែមល្បឿនបើកគេចបាត់ស្រមោល។
បន្ទាប់ពីកើតហេតុប្រមាណ១៥នាទីក្រោយមកគេឃើញ សមត្ថកិច្ចមូលដ្ឋាន និងរថយន្តពេទ្យឯកជនបានមកដល់ ហើយជួយលើកជនរងគ្រោះដាក់លើរថយន្ត ដើម្បីបញ្ជូនទៅមន្ទីរពេទ្យកាល់ម៉ែត ប៉ុន្តែដោយសារអ្នករបួសមានសភាពធ្ងន់ធ្ងរពេកជនរគ្រោះទាំងពីរ បានស្លាប់ជាបន្តបន្ទាប់គ្នាមុនពេលទៅដល់មន្ទីរពេទ្យ គួរឱ្យសោកស្តាយ ។ សមត្ថកិច្ចបាននិយាយថា ជនរងគ្រោះដែលស្លាប់ម្នាក់ឈ្មោះគឹម វិចិត្រ ភេទប្រុស អាយុ២២ឆ្នាំ ស្នាក់នៅសង្កាត់អូរឫស្សី ខណ្ឌ៧មករា និងម្នាក់ទៀតឈ្មោះពិន វណ្ណៈ ភេទប្រុស អាយុ២៣ឆ្នាំ ស្នាក់នៅសង្កាត់វាលវង់ ខណ្ឌ៧មករា។
បន្ទាប់ពីនគរបាលជំនាញធ្វើការវាស់វែងរួច ម៉ូតូរបស់ជនរងគ្រោះត្រូវបានយកទៅរក្សាទុកនៅការិយាល័យនគរបាល ចំណែកសពប្រគល់ឲ្យក្រុមគ្រួសារយកទៅធ្វើបុណ្យ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
