រាជធានីភ្នំពេញ ៖ ពេលកំពុងជួបជុំមិត្តភក្តិផឹកស៊ី បុរសម្នាក់បានសុំចេញមកមុន រួចលួចនាំស្ត្រីរកស៊ីផ្លូវភេទម្នាក់នៅម្តុំវត្តភ្នំទៅឡើងឋានសួគ៌រួចរាល់ ត្រូវស្ត្រីម្នាក់នោះលួចយកកាបូបលុយអស់ជាង៣០០ដុល្លារ និងកាតគ្រីម៉ូតូមួយទៀត បន្ទាប់មកបុរសជាម្ចាស់កាបូប និងមិត្តភក្តិនាំគ្នាតាមរក ស្រាប់តែប្រទះឃើញស្ត្រីរកស៊ីផ្លូវភេទម្នាក់ផ្សេងទៀត ក៏នឹកស្មានថាជាបក្ខពួកផ្សំគំនិតគ្នា បានវាយទៅលើនាងចំនួន២ដៃ បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ថ្ងៃទី១៣ ខែមីនា ឆ្នាំ២០១៩ តាមបណ្តោយផ្លូវ៥១ នៅចំណុចរង្វង់មូលវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ ។
ស្ត្រីរកស៊ីផ្លូវភេទម្នាក់ដែលត្រូវគេវាយខាងលើឈ្មោះស្រី លន អាយុជាង៣០ឆ្នាំ ស្នាក់នៅផ្ទះជួលគ្មានលេខ ម្តុំផ្សារសាំហាន់ សង្កាត់ទួលសង្កែទី១ ខណ្ឌឬស្សីកែវ ។
បើតាមប្រភពព័ត៌មានពីបុរសជាម្ចាស់កាបូបខាងលើឈ្មោះម៉េង ឆាយ អាយុប្រហែល២៨ទៅ២៩ឆ្នាំ បានអោយដឹងថា មុនពេលកើតហេតុ គាត់ជាមួយមិត្តភក្តិបានអង្គុយផឹកស៊ីនៅម្តុំក្បែរកន្លែងកើតហេតុ លុះពេលស្រវឹងគាត់ក៏សុំមិត្តភក្តិចេញមកមុន មិនអោយមិត្តភក្តិដឹងថាគាត់លួចមកយកស្ត្រីរកស៊ីផ្លូវភេទទៅឡើងឋានសួគ៌នោះទេ រហូតបើកប្រតិបត្តិការចប់រួចរាល់ ស្រាប់តែបាត់កាបូបលុយដែលនៅក្នុងកាបូបនោះមានលុយជាង៣០០ដុល្លារ និងកាតគ្រីម៉ូតូម៉ាកហុងដាឌ្រីមមួយទៀត ។
ប្រភពដដែលបានអះអាងថា ស្ត្រីម្នាក់ដែលគាត់នាំទៅឡើងឋានសួគ៌នោះគឺជាអ្នកលួចកាបូបលុយរបស់គាត់ បន្ទាប់មកគាត់ក៏ទៅប្រាប់មិត្តភក្តិអោយជួយដើររក លុះពេលមកដល់ចំណុចម្តុំវត្តភ្នំវិញ ស្រាប់តែប្រទះឃើញស្ត្រីរកស៊ីផ្លូវភេទម្នាក់ផ្សេងទៀតកំពុងតែឈរ ក៏នឹកស្មានថាជាបក្ខពួកផ្សំគំនិតគ្នា ពេលនោះគាត់ខឹងពេកបានវាយចំនួន២ដៃចំមុខស្ត្រីរកស៊ីផ្លូវភេទនោះ បណ្តាលអោយរងរបួសយ៉ាងដំណំ ភ្លាមៗនោះដែរក៏មានបក្ខពួករបស់ស្ត្រីរកស៊ីផ្លូវភេទនោះចំនួន២ទៅ៣នាក់ទៀតមានទាំងស្រីមានទាំងប្រុសបានមកវាយទៅលើគាត់ថែមទៀតបង្កការភ្ញាក់ផ្អើលដល់សមត្ថកិច្ច និងអ្នកសារព័ត៌មានជាច្រើនតែម្តង ។
បើតាមសំដីរបស់ស្ត្រីរកស៊ីផ្លូវភេទវិញបាននិយាយថា គាត់មិនបានលួចកាបូបលុយដូចបុរសខាងលើចោទប្រកាន់នោះទេ គឺបុរសខាងលើបានយកស្រីផ្សេងទេ គាត់មិនដែលស្គាល់ និងមិនបានទៅដេកជាមួយទេ ខ្លួនឯង(បុរសខាងលើ)បែកថ្នាំ បែរជាមករករឿង និងវាយគាត់ទៅវិញ ។
ក្រោយពេលកើត ជនរងគ្រោះនឹកឃើញថា កាបូបលុយរបស់គាត់បានបាត់ទៅហើយ ដាក់ពាក្យបណ្តឹងក៏មិនមានបានការអ្វីនោះដែរ ក៏ជិះម៉ូតូត្រឡប់ទៅផ្ទះបាត់ទៅ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
