នារីម្នាក់ញុំាកាហ្វេមួយថ្ងៃ ១០កែវ... ៧ឆ្នាំក្រោយឆ្អឹងនាងទ្រុឌទ្រោម ប្រៀបដូចជាយាយចាស់មានជំងឺពុកឆ្អឹងអីចឹង

ចិន៖ នារីអាយុ ៣០ឆ្នាំម្នាក់រស់នៅក្នុងប្រទេសចិន ដែលតែងតែញុំាកាហ្វេច្រើនពេកជារៀងរាល់ថ្ងៃ ត្រូវបានគ្រូពេទ្យរកឃើញថា ឆ្អឹងរបស់នាងប្រៀបដូចជាលោកយាយចាស់ម្នាក់អីចឹង។

អ្នកនាង Han Xiao ជាបុគ្គលិកការិយាល័យម្នាក់នៅក្នុងទីក្រុង Wuhan ខេត្ត Hubei ដោយថ្មីៗនេះមានជំងឺផ្តាសាយ ហើយឈានទៅដល់ការក្អករ៉ាំរ៉ៃជាងមួយសប្តាហ៍។ 

យប់មួយ អ្នកនាង Han ស្រាប់តែក្អកខ្លាំងមែនទែនរហូតដល់ទៅ ១០នាទីជាប់ៗគ្នា ដែលការក្អកខ្លាំងបែបនេះធ្វើឱ្យអ្នកនាងមានការឈឺចាប់លើដើមទ្រូងជាខ្លាំង។

នៅព្រឹកស្អែក នាងក៏ទៅមន្ទីរពេទ្យ Wuhan Central ដើម្បីពិនិត្យព្យាបាល ប៉ុន្តែនាងមានការភ្ញាក់ផ្អើលជាខ្លាំងនូវអ្វីដែលគ្រូពេទ្យបានរកឃើញ។ ជាក់ស្តែងបន្ទាប់ពីថតកាំរស្មីអ៊ិច (X-ray) រួច គ្រូពេទ្យបានរកឃើញថា មូលហេតុបណ្តាលឱ្យអ្នកនាង Han មានការឈឺចាប់លើដើមទ្រូងជាខ្លាំងបែបនេះ ព្រោះតែនាងបានបាក់ឆ្អឹងជំនី ៣កង់ ដោយសារតែការក្អករ៉ាំរ៉ៃធ្ងន់ធ្ងរពេក។

គ្រូពេទ្យក៏បានសួរនាំនាងបន្ថែមទៀតទាក់ទងទៅនឹងទម្លាប់ប្រចាំថ្ងៃនាង នាងបាននិយាយថា នាងបាននិងកំពុងញុំាកាហ្វេដូចជាញុំាទឹកអីចឹង ពោលគឺនាងញុំាកាហ្វេ ១០កែវក្នុងមួយថ្ងៃ ហើយញុំាបែបនេះអស់រយៈពេល ៧ឆ្នាំមកហើយ។

ក្រោយមក គ្រូពេទ្យបានពិនិត្យឆ្អឹងរបស់នាង រកឃើញថាឆ្អឹងរបស់នាងមានសភាពប្រៀបដូចជាលោកយាយចាស់អាយុ ៦០ឆ្នាំម្នាក់អីចឹង។ លើសពីនេះទៅទៀត គ្រូពេទ្យបានរកឃើញថា អ្នកនាង Han កំពុងឈានដល់ដំណាក់ការមានជំងឺពុកឆ្អឹងហើយ។ 

លោកវេជ្ជបណ្ឌិត Chen Baojun បាននិយាយថា៖

«មូលហេតុដែលបណ្តាលឱ្យក្មេងៗមានជំងឺពុកឆ្អឹង គឺដោយសារតែកង្វះលំហាត់ប្រាណ, ការជក់បារី និងហូបគ្រឿងស្រវឹងហួសកម្រិត, ការញុំាកាហ្វេ និងភេសជ្ជៈមានជាតិកាបូនដូចជា សូដា ទឹកក្រូចជាប្រចាំ ដែលកត្តាទាំងអស់នេះធ្វើឱ្យឆ្អឹងកាន់តែមានសភាពចាស់ទ្រុឌទ្រោមឡើងពីមួយថ្ងៃទៅមួយថ្ងៃ។»

យ៉ាងណាមិញ យោងតាមស្តង់ដារនៃការទទួលទានជាតិកាហ្វេអ៊ីន របស់អង្គការសុខភាពពិភពលោក (WHO) បានឱ្យដឹងថា៖ 

១. ការទទួលទានជាតិកាហ្វេអ៊ីនត្រឹម ២០០មីលីក្រាម ឬតិចជាង ៤០០មីលីក្រាមក្នុងមួយថ្ងៃ មិនបង្កហានិភ័យដល់សុខភាពនោះទេ។

២. ស្រ្តីមានផ្ទៃពោះមិនគួរបរិភោគជាតិកាហ្វេអ៊ីនលើសពី ២០០មីលីក្រាមក្នុងមួយថ្ងៃទេ។

៣. ខណៈពេលជាតិកាហ្វេអ៊ីនមានហានិភ័យចំពោះកុមារ និងក្មេងជំទង់ ប៉ុន្តែមិនមានទិន្នន័យគ្រប់គ្រាន់ក្នុងការកំណត់ចំនួនសុវត្ថិភាពជាក់លាក់ណាមួយសម្រាប់ក្មេង និងក្មេងជំទង់ក្នុងការទទួលទានសារជាតិកាហ្វេអ៊ីននេះទេ៕