ស្ត្រីចិនម្នាក់ចំណាយលុយជាង ១ពាន់ដុល្លារ ទៅវះកាត់កែសម្ផស្សឲ្យសត្វឆ្មា ព្រោះតែគិតថាវាមានមុខមាត់អាក្រក់...

ចិន៖ ស្រ្តីជនជាតិចិនម្នាក់ ត្រូវបានរងការរិះគន់ និងខឹងសម្បាយ៉ាងខ្លាំង ពីសំណាក់មហាជនជាច្រើន ពិសេសអ្នកនិយមលេងបណ្តាញសង្គមចិនតែម្តង បន្ទាប់ពីនាងបានចំណាយលុយមិនចេះតិច ទៅវះកាត់កែសម្ផស្សឲ្យសត្វឆ្មាចិញ្ចឹមរបស់នាង ទាំងដែលវាអាចប្រឈមនឹងគ្រោះថ្នាក់។ 

បើយោងតាមប្រភពសារព័ត៌មាន បានឲ្យដឹងថា ស្រ្តីជនជាតិចិនដែលមិនត្រូវបានគេបង្ហាញអត្តសញ្ញាណខាងលើនេះ រស់នៅក្នុងទីក្រុង Nanjing ខេត្ត Jiangsu ។

ចំពោះមូលហេតុដែលជំរុញឲ្យនាងសម្រេចចិត្តធ្វើបែបនេះ ត្រូវបានគេដឹងថា ក៏ដោយសារតែនាងគិតថា សត្វឆ្មាចិញ្ចឹមរបស់នាង វាមានមុខមាត់អាក្រក់ និងជាពិសេសនោះ គឺត្របកភ្នែកមិនស្អាតនិងគួរឲ្យខ្លាច។

នាងបានចំណាយទឹកប្រាក់ប្រមាណ ១ម៉ឺនយ័ន (ប្រហែល ១ ៤៩៦ដុល្លារ) ឲ្យទៅក្រុមគ្រូពេទ្យសត្វ ដើម្បីឲ្យពួកគេវះកាត់កែសម្ផស្សត្របកភ្នែកឆ្មានាងចេញ។ ក្រុមគ្រូពេទ្យទាំងអស់នោះ បានប្រើកូនកាំបិតសម្រាប់វះកាត់ ទៅកាត់ត្របកភ្នែកទាំងសងខាងរបស់សត្វឆ្មានេះចេញ។

បន្ទាប់ពីការវះកាត់នេះ គេឃើញថា រោមនៅលើផ្ទៃមុខសត្វឆ្មានេះ ត្រូវបានគេកោរចេញខ្លះដើម្បីធ្វើការវះកាត់ ស្របពេលដែលភ្នែករបស់វាឡើងក្រហមទាំងគូតែម្តង។  នៅផ្នែកខាងក្រោមនៃត្របកភ្នែកទាំងសងខាង ក៏នៅមានបន្សល់ស្នាមដេរផងដែរ។

យោងតាមការបញ្ជាក់របស់បុគ្គលិកម្នាក់ ប្រចាំមន្ទីរពេទ្យសត្វក្នុងទីក្រុង Nanjing បានឲ្យដឹងថា សព្វថ្ងៃការវះកាត់ត្របកភ្នែកនេះ គឺពេញនិយមសម្រាប់សត្វឆ្កែ ក្នុងករណីដែលម្ចាស់វាចង់យកវាទៅបង្ហាញក្នុងកម្មវិធីណាមួយ។

ប៉ុន្តែយ៉ាងណាមិញ សម្រាប់ការវះកាត់ត្របកភ្នែកឲ្យសត្វឆ្មានេះ វាក៏នឹងអាចបណ្តាលឲ្យមានគ្រោះថ្នាក់ដល់ជីវិត និងធ្វើឲ្យវាពិបាកក្នុងការរស់នៅផងដែរ៕