បរទេស៖ កីឡាករ Cristiano Ronaldo បានផ្ទេរមកពី Real Madrid ទៅកាន់ Juventus កាលពីរដូវក្តៅឆ្នាំមុន ក្នុងតម្លៃខ្លួន ១០០លានអឺរ៉ូ។ បន្ទាប់ពីការផ្ទេរបានជោគជ័យ CR7 ជឿជាក់ថា នេះជាបទពិសោធន៍ប្រកួតប្រជែងថ្មីមួយទៀតក្នុងអាជីពបាល់ទាត់របស់លោក។
ដោយឡែកសម្រាប់កីឡាករ Zlatan Imbrahimovic បានរិះគន់ខ្លាំងៗថា លោកមិនជឿថាការផ្ទេររបស់ Ronaldo ទៅកាន់ Juventus ជាការប្រកួតប្រជែងថ្មីនោះទេ ដោយលោកយល់ថាក្លិបយក្សរបស់អ៊ីតាលីមួយនេះ ខ្លាំងដាច់គេស្រាប់ទៅហើយនៅក្នុង Serie A របស់អ៊ីតាលីនាពេលបច្ចុប្បន្ននេះ។
ក្នុងបទសម្ភាសន៍មួយ កីឡាករដែលកំពុងប្រកបអាជីពនៅ LA Galaxy រូបនេះនិយាយថា៖ “ខ្ញុំយល់ថាការផ្ទេររបស់ Ronaldo ទៅកាន់ Juventus ជារឿងមួយដ៏អស្ចារ្យ ប៉ុន្តែខ្ញុំគិតថាវាមិនមែនជាការប្រកួតថ្មីស្អីឡើយសម្រាប់គេ (Ronaldo) ។ យើងមិនអាចហៅការផ្ទេរទៅកាន់ក្លិបមួយក្នុងចំណោមក្លិបល្អជាងគេលើលោក ថាជាការប្រកួតប្រជែងនោះឡើយ”។
Zlatan បានបន្តថា៖ “នេះប្រហែលមកពីការគិតរបស់គេ (Ronaldo) សម្រាប់ខ្ញុំ Challenge គឺជាការចូលរួមជួយក្លិបមួយឱ្យល្អបំផុតតាមដែលអាចធ្វើទៅបាន”។
ទោះបីជាយ៉ាងណាក្តី Zlatan យល់ថា ការផ្ទេររបស់ Ronaldo ទៅកាន់ Juventus គឺពិតជាបានទាញយកចំណាប់អារម្មណ៍ពីអ្នកគាំទ្រជាច្រើន មកកាន់លីគអ៊ីតាលី។ ដោយឡែកពាក់ព័ន្ធនឹងការប្រកួតប្រជែងក្នុងពានរង្វាន់ UEFA Champions League វិញ Zlatan យល់ថា ឆ្នាំនេះគឺមានការប្រកួតប្រជែងខ្លាំងមែនទែន ហើយគ្មានក្រុមណាខ្លាំងដាច់ជាងក្រុមណាឡើយ។ សម្រាប់លោកផ្ទាល់យល់ថា ក្រុមដែលអាចឈ្នះពាន UEFA Champions League គឺជាអតីតក្រុមរបស់លោករួមមាន PSG, Manchester United, Juventus ឬ Barcelona ក៏ថាបាន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
