អង់គ្លេស៖ លោក Maurizio Sarri និយាយថា កីឡាកររបស់ Chelsea ពេលនេះ ហាក់បីដូចជាមានការពិបាក “ស្តារទឹកចិត្ត” របស់ក្រុមទាំងមូលឡើងវិញណាស់។ គ្រូបង្វឹករូបនេះនិយាយដូច្នេះក្រោយពី Chelsea បានទទួលបរាជ័យក្នុងជំនួបជាមួយ Arsenal ក្នុងលទ្ធផល ២-០ កាលពីយប់មិញ។ មិនត្រឹមតែប៉ុណ្ណោះ លោក Sarri ក៏បានបង្ហាញភាពមិនពេញចិត្តយ៉ាងខ្លាំងចំពោះទម្រង់លេងរបស់កូនក្រុមលោកនៅជំនួបជាមួយ Arsenal។
ក្រុមតោខៀវ Chelsea ក្នុងចំណោម ៥ប្រកួតចុងក្រោយអាចរកជ័យជម្នះបាន ២ប្រកួតតែប៉ុណ្ណោះ ខណៈដែលយប់មិញការប្រកួតពេញ ៩០នាទី ពួកគេធ្វើមិនបានល្អសោះ ដោយអាចស៊ុតចំគោលដៅ On-Target ម្តងគត់ ពេលប្រកួតទល់នឹង Arsenal។
ដោយឡែកក្នុងសន្និសីទកាសែតក្រោយចប់ការប្រកួត លោក Sarri បានបដិសេធការបកស្រាយជាភាសាអង់គ្លេស ដោយលោកសុំនិយាយជាភាសាអ៊ីតាលីព្រោះហេតុផលថា វាមានភាពងាយស្រួលបញ្ចេញអារម្មណ៍របស់លោកឱ្យបានច្បាស់ទៅកាន់កូនក្រុម។ លោក Sarri បាននិយាយថា៖ "មិនអាចប្រកែកបានទេ ខ្ញុំត្រូវតែនិយាយថា ខ្ញុំពិតជាខឹងខ្លាំងណាស់។ បរាជ័យរបស់ពួកយើងលើកនេះ គឺបណ្តាលមកពីទឹកចិត្តរបស់កីឡាករច្រើនជាងអ្វីៗទាំងអស់"។
លោក Maurizio Sarri បានបន្ថែមទៀតថា៖ "បរាជ័យនេះពិតជាមិនអាចទទួលយកបានឡើយ ហើយកីឡាករនៅក្នុងក្រុមទាំងមូលហាក់ដូចជាមានបញ្ហាពិបាកខ្លាំង ក្នុងការលើកទឹកចិត្តពួកគេ ឱ្យត្រលប់មកស្ថានការដើមវិញ"។
ដោយឡែក ចំពោះទម្រង់លេងរបស់ក្រុមវិញ លោក Sarri បាននិយាយថា៖ "នេះមិនមែនជា Chelsea ដែលគេស្គាល់ពីមុននោះឡើយ"។
គួរបញ្ជាក់ថា ក្រោយពីបរាជ័យទល់នឹង Arsenal យប់មិញ បច្ចុប្បន្ននេះ Chelsea មាន ៤៧ពិន្ទុក្នុងដៃ ស្ថិតនៅចំណាត់ថ្នាក់លេខ ៤ដដែល។ សម្រាប់ក្រុមដែលកំពុងដេញតាមពីក្រោយរួមមាន Arsenal និង Manchester United ដែលស្ថិតនៅលេខ ៥ និងលេខ ៦ មាន ៤៤ពិន្ទុស្មើគ្នា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]