ចិន៖ ស្ថាបនិកក្រុមហ៊ុន Huawei លោក Ren Zhengfei បានធ្វើការបដិសេធយ៉ាងមុតមាំចំពោះការចោទប្រកាន់ថាក្រុមហ៊ុនលោកបានស៊ើបការណ៍ពីអតិថិជនរបស់ខ្លួនឱ្យរដ្ឋាភិបាលចិន។ នេះបើយោងតាមសារព័ត៌មាន Reuters និង BBC បានចុះផ្សាយកាលពីពេលថ្មីៗនេះ។
លោកបានថ្លែងថា លោកពិតជានឹកកូនស្រីរបស់លោកខ្លាំងណាស់ ដែលបច្ចុប្បន្ននាងត្រូវបានឃាត់ខ្លួននៅក្នុងប្រទេសកាណាដា ដោយសារជាប់ពាក់ព័ន្ធទៅនឹងជម្លោះនយោបាយ។
កូនស្រីរបស់មេ Huawei អ្នកនាង Meng Wanzhou ដែលជាប្រធានគ្រប់គ្រងហិរញ្ញវត្ថុរបស់ក្រុមហ៊ុន Huawei ត្រូវបានឃុំខ្លួននៅក្នុងប្រទេសកាណាដា កាលពីខែមុន តាមការស្នើសុំរបស់អាជ្ញាធរសហរដ្ឋអាមេរិកដែលចោទប្រកាន់ថា អ្នកនាងបានរំលោភបទបញ្ជាធនាគារដោយមានជាប់ពាក់ព័ន្ធទៅនឹងការគ្រប់គ្រងក្រុមហ៊ុន Huawei នៅក្នុងប្រទេសអ៊ីរ៉ង់។
លោក Ren Zhengfei បាននិយាយបន្ថែមទៀតថា «ខ្ញុំមិនដែលទទួលបានសំណើណាមួយពីរដ្ឋាភិបាលចិនក្នុងការផ្តល់ព័ត៌មាននោះទេ។ ខ្ញុំនៅតែស្រលាញ់ប្រទេសរបស់ខ្ញុំ និងគាំទ្របក្សរបស់ខ្ញុំជានិច្ច ប៉ុន្តែខ្ញុំគ្មានថ្ងៃធ្វើរឿងអ្វីមួយដែលប៉ះពាល់ទៅដល់ប្រទេសដទៃទៀតនៅលើពិភពលោកនេះឡើយ ហើយខ្ញុំពិតជានឹកកូនស្រីរបស់ខ្ញុំខ្លាំងណាស់»។
Huawei ជាក្រុមហ៊ុនផលិតឧបករណ៍គ្រឿងអេឡិចត្រូនិចដ៏ធំមួយនៅលើពិភពលោក កំពុងប្រឈមមុខ និងរងផលប៉ះពាល់យ៉ាងខ្លាំងក្លាដោយសារភាពតានតឹងរវាងអាមេរិក និងចិន។ ហើយពេលនេះក្រុមហ៊ុនយក្សនេះកំពុងស្ថិតក្រោមការចោទប្រកាន់របស់អាមេរិកថាឧបករណ៍របស់ Huawei គឺប្រើសម្រាប់ការស៊ើបការណ៍ឱ្យរដ្ឋាភិបាលចិន។
ទោះយ៉ាងណា គ្មានភស្តុតាងគ្រប់គ្រាន់សម្រាប់បញ្ជាក់ជាសារធារណៈថាក្រុមហ៊ុនយក្សមួយនេះបានស៊ើបការណ៍ឱ្យរដ្ឋាភិបាលចិននោះទេ ហើយក្រុមហ៊ុននៅតែច្រានច្រោលការចោទប្រកាន់មួយនេះដដែល។
បន្ថែមពីនេះទៀត នៅលើទីផ្សារលោកខាងលិចកំពុងហាមឃាត់ផលិតផលរបស់ Huawei ហើយតួយ៉ាងដូចជាប្រទេសប៉ូឡូញ បានថ្លែងកាលពីសប្តាហ៍នេះថា ខ្លួនអាចពិចារណាបិទការនាំចូលផលិតផល Huawei ទាំងអស់។
លោក Ren Zhengfei បានបន្តថ្លែងទៀតថា "រឿងបែបនេះតែងតែកើតមានឡើងហើយ យើងមិនអាចធ្វើការជាមួយមនុស្សគ្រប់គ្នាបាននោះទេ... យើងនឹងបង្វែរទិសដៅទៅរកប្រទេសណាដែលស្វាគមន៍ Huawei វិញ ហើយបច្ចុប្បន្ន Huawei មានកុងត្រាចំនួន ៣០ លើសកលលោកដើម្បីសាងសង់ប្រព័ន្ធបច្ចេកវិទ្យា 5G៕
តើប្រិយមិត្តយល់យ៉ាងណាដែរ?
ចង់ជ្រាបច្បាស់ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]