តារាប្រុសចិន មានការភ្ញាក់ផ្អើល ពេលគេចេញច្បាប់ថ្មីមួយ ហាមមិនឲ្យធ្វើបែបនេះ ពេលឡើងទូរទស្សន៍

ចិន៖ ក្លាយជារឿងមួយដ៏ក្តៅគគុក នៅពេលដែលតារាប្រុសនៅក្នុងប្រទេសចិន ត្រូវធ្វើតាមច្បាប់ថ្មីមួយដែលគេបានកំណត់នៅពេលឡើងកម្មវិធីទូរទស្សន៍។

នៅថ្ងៃទី១៦ ខែមករា ឆ្នាំ២០១៩នេះ នៅក្នុងបណ្តាញសង្គម weibo ដែលជាបណ្តាញសង្គមដ៏ពេញនិយមមួយនៅក្នុងប្រទេសចិន បានលេចឡើងនូវ Hashtag មួយជាភាសាចិនដែលប្រែជាភាសាខ្មែរថា #តារាប្រុសហាមពាក់ក្រវិលនៅពេលដែលថតកម្មវិធីទូរទស្សន៍ ធ្វើឲ្យអ្នកគាំទ្រមានប្រតិកម្មជាខ្លាំង។

ស្ថានីយ៍វិទ្យុនិងទូរទស្សន៍ SARFT ប្រចាំប្រទេសចិនបានចេញច្បាប់ថ្មី មិនអនុញ្ញាតឲ្យតារាប្រុសពាក់ក្រវិលនោះទេ នៅពេលថតកម្មវិធីដែលត្រូវចាក់ផ្សាយតាមទូរទស្សន៍។ ជាក់ស្តែងធ្លាប់មានតារាប្រុសមួយចំនួនដូចជា Lin Yanjun, Xiao Gui ជាដើមដែលត្រូវបានគេបិទបាំងត្រង់ក្រវិលដើម្បីមិនឲ្យមើលឃើញ។

ដោយយោង តាមប្រភពព័ត៌មានដ៏ល្បីរបស់ប្រទេសចិន បានសន្និដ្ឋានពីមូលហេតុដែលនាំឲ្យបង្កើតច្បាប់នេះឡើង ក៏ព្រោះតែ ក្រវិលជាគ្រឿងលម្អសម្រាប់នារី ហើយមនុស្សប្រុសមិនគួរពាក់វានោះទេ ត្រូវចែងឲ្យច្បាស់រវាងមនុស្សស្រី និងមនុស្សប្រុស។

ជាមួយគ្នានេះដែរ មានតារាប្រុសប៉ុន្មានរូបដែលត្រូវហាមជាដាច់ខាត ព្រោះពួកគេមានឥទ្ធិពលខ្លាំងទៅលើយុវវ័យដែលតែងតែយកតម្រាប់តាមពួកគេ។ តារាទាំងនោះមានដូចជា Kris Wu លោក Jackson GOT7 លោក William Chan និង Zhang Yixing។

គួរបញ្ជាក់ផងដែរថា មានអ្នកគាំទ្រជាច្រើនសម្តែងការមិនពេញចិត្ត ដោយពួកគេគិតថាវាដូចជាលើសពីអ្វីដែលត្រូវហាមឃាត់ រហូតអ្នកខ្លះនិយាយថា ប្រសិនបើបែបនេះពិតមែន កុំភ្លេចចេញច្បាប់ហាមមិនឲ្យមនុស្សស្រីពាក់អាវស៊ិចស៊ី និងសំពត់ខ្លីផងដែរទៅ៕

ទស្សនារូបភាពខាងក្រោម៖

• តារាចិន