ផ្លូវការ៖ Guangzhou Evergrande ទិញយក Paulinho ពី Barcelona ទៅវិញ

អេស្ប៉ាញ៖ កាលពីយប់មិញនេះ ក្លិបបាល់ទាត់ FC Barcelona បានបញ្ជាក់ឱ្យដឹងថា ក្លិបដើមរបស់កីឡាករ Paulinho បានធ្វើការទាក់ទងមក ដើម្បីនាំយកកីឡាកររូបនេះត្រលប់ទៅវិញ។ 

Barcelona បានបញ្ជាក់ឱ្យដឹងបន្ថែមទៀតថា ក្លិប Guangzhou Evergrande បានសម្រេចនាំយក Paulinho ទៅវិញដោយប្រើប្រាស់លក្ខខណ្ឌទិញត្រលប់ “Buy-Back” ដូចដែលបានព្រមព្រៀងជាមួយក្លិបអេស្ប៉ាញមួយនេះពីមុនមក។

កីឡាករឆ្នើមសញ្ជាតិប្រេស៊ីល Paulinho ត្រូវបានគេដឹងថា រូបគេបានវិលទៅកាន់លីគកំពូលចិន ក្នុងការចរចាតាំងពីខែកក្កដាមកម្ល៉េះ ក៏ប៉ុន្តែក្លិប Barcelona ទើបតែបានធ្វើសេចក្តីប្រកាសផ្លូវការកាលពីម្សិលមិញនេះប៉ុណ្ណោះ។ 

ដោយឡែក ចំពោះតម្លៃផ្ទេរចេញរបស់ Paulinho ទៅកាន់ក្លិបយក្សរបស់ចិនវិញ Barcelona មិនបានបញ្ជាក់ឱ្យច្បាស់ពីតម្លៃនៃការផ្ទេរនេះទេ ដោយគេជឿថាការផ្ទេរ Paulinho ទៅវិញនេះអាចមានតម្លៃថ្លៃជាង ៤០លានអឺរ៉ូ ដែល Barcelona បាននាំយករូបគេមកកាលពីឆ្នាំ២០១៧ ពោលគឺតម្លៃផ្ទេរចេញអាចស្ថិតក្នុងចន្លោះ ៤២លាន ទៅ ៤៥លានអឺរ៉ូ៕