សុខភាពមាត់ធ្មេញល្អមិនត្រឹមជួយលើកសម្រស់មុខមាត់ទេ ថែមទាំងចូលរួមចំណែកជួយដល់សុខភាពទូទៅទៀតផង។
ទោះបីលោកអ្នកដុសធ្មេញ ឬការប្រើប្រាស់ទឹកខ្ពុរមាត់ជាប្រចាំក្តី ក៏មិនប្រាកដថាអាចធានាបានសុខភាពមាត់ធ្មេញ ១០០% ឡើយ។ អ្នកខ្លះនៅមានបញ្ហាឈឺធ្មេញ និងរាក់ស៊ីធ្មេញ ជាដើម។ បញ្ហាទាំងនេះបណ្តាលមកពីរបបអាហារដែលយើងបរិភោគរាល់ថ្ងៃនេះឯង។ ចំណីអាហារសំបូរជាតិស្ករខ្លាំងពេក ជាបញ្ហាចំបងនៃជំងឺពុកធ្មេញ ដែលអាចបង្កបញ្ហាជាច្រើន។
ដូច្នេះបើលោកអ្នកចង់កាត់បន្ថយបញ្ហាមាត់ធ្មេញ យើងត្រូវយល់ដឹងអំពីចំណីអាហារទាំង៤ប្រភេទដែលជួយដល់សុខភាពមាត់ធ្មេញ៖
១. ខ្ទឹមបារាំង
ការហូបខ្ទឹមបារាំងឆៅ ឬ ឆ្អិនតិចៗមានអត្ថប្រយោជន៍យ៉ាងខ្លាំងដល់សុខភាពមាត់ធ្មេញ ព្រោះវាមានផ្ទុកសារធាតុប្រឆាំងនឹងមេរោគ ដែលមានសារៈសំខាន់យ៉ាងខ្លាំងសម្រាប់សម្លាប់និងការពារពីការរីកលូតលាស់នៃមេរោគក្នុងមាត់។ វាក៏ជាភ្នាក់ងារប្រឆាំងនឹងការរលាកកោសិកា បណ្តេញជាតិពុលពីក្នុងខ្លួន និងការពារពុកឆ្អឹងទៀតផង។
២. បន្លែស្លឹក
ស្ពៃខាត់ណា ស្ពៃខ្មៅ ស្ពៃក្រញាញ់ ជាដើម ជាប្រភពវីតាមីននិងសារធាតុរ៉ែជាច្រើនដែលល្អយ៉ាងខ្លាំងសម្រាប់សុខភាពមាត់ធ្មេញ។ សារធាតុកាល់ស្យូម ឬ វីតាមីនB និង D សំបូរក្នុងពពួកបន្លែទាំងនេះ អាចជួយពង្រឹងកាចាធ្មេញ ការពារពីជំងឺអញ្ចាញធ្មេញ និងធ្វើឲ្យធ្មេញរឹងមាំមិនងាយពុក។
៣. បន្លែផ្លែឈើស្រួយៗ
ការហូបពពួកបន្លែផ្លែឈើដូចជា ផ្លែប៉ោម ការ៉ុត ជាដើម ជាភ្នាក់ងារសម្អាតមាត់ធ្មេញដ៏ល្អ ព្រោះជួយបង្កើនលំហូរទឹកមាត់ ដែលអាចនាំយកចេញបាក់តេរី កាកសំណល់ កំទេចកំទីចំណីអាហារតាមចន្លោះៗធ្មេញ ពេលយើងដុសធ្មេញពុំបានស្អាតល្អ។ ផ្លែឈើបន្លែប្រភេទនេះសំបូរជាតិកាកសរសៃ វីតាមីនAនិងC ដែលល្អខ្លាំងសម្រាប់សុខភាពអញ្ចាញធ្មេញយើង។
៤. តែ
ពិសាតែពុំដាក់ជាតិផ្អែម ជាពិសេស តែបៃតង ឬ តែខ្មៅ អាចជួយបំបាត់សារធាតុពុលបញ្ចេញដោយបាក់តេរីក្នុងមាត់ និងកាត់បន្ថយការលូតលាស់បាក់តេរីលើផ្ទៃធ្មេញ និងអណ្តាត។ វាជួយកាត់បន្ថយហានិភ័យជំងឺអញ្ចាញធ្មេញ និងជំងឺពុកធ្មេញ។ ក្រៅពីនេះ កាត់បន្ថយដុំកករកម្អែលតាមជើងធ្មេញ និងជួយកាត់បន្ថយក្លិនមាត់ទៀតផង។
ទោះបីជាយ៉ាងណា ការពិសាច្រើនញឹកញាប់ ដោយមិនបានខ្ពុរមាត់ ឬ ដុសធ្មេញទេ អាចបណ្តាលឲ្យធ្មេញឡើងលឿងផងដែរ ហេតុនេះកុំចោលការដុសធ្មេញជាប្រចាំ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]