ខេត្តកំពង់ស្ពឺ ៖ បុរសម្នាក់ត្រូវសមត្ថកិច្ចចាប់ឃាត់ខ្លួន បន្ទាប់ពីបានធ្វើសកម្មភាពវាយដំម្តាយ និងបំផ្លាញទ្រព្យសម្បត្តិក្នុងផ្ទះ ។
ករណីនេះបានកើតឡើងកាលពីវេលា៧និង៣០នាទីព្រឹកថ្ងៃទី១២ ធ្នូ ២០១៨ ស្ថិតក្នុងភូមិត្រពាំងខ្យង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។
កូនប្រុសដែលជាជនសង្ស័យខាងលើឈ្មោះ ឆន ចាន់ឡី អាយុ២៥ឆ្នាំ ចំណែកម្តាយឈ្មោះ ម៉ាន់ ឆែម អាយុ ៥០ឆ្នាំ រស់នៅភូមិឃុំកើតហេតុខាងលើ។
ប្រភពពីសមត្ថកិច្ចបានអោយដឹងថា កូនប្រុសដែលជាជនសង្ស័យខាងលើត្រូវសមត្ថកិច្ចឃាត់ខ្លួនពាក់ព័ន្ធករណីហិង្សាក្នុងគ្រួសារ ដោយបានគំរាម និងដេញវាយម្ដាយរបស់ខ្លួន ព្រមទាំងបានវាយបំផ្លិចបំផ្លាញ បណ្តាលឱ្យរងការខូចខាតពាងបែកអស់១, បែកកញ្ចក់អស់មួយផ្ទាំង និងកាត់ខ្សែពានគោយន្ដទៀតផង។
តាមការបំភ្លឺរបស់ស្ត្រីជាម្តាយបានឱ្យដឹងថា មុនពេលកើតហេតុ គាត់នៅផ្ទះជាធម្មតា ស្រាប់តែមិនដឹងថាកូនប្រុសមកពីណាឡើយ បានសុំលុយ តែគាត់ប្រាប់កូនប្រុសដែលជាជនសង្ស័យខាងលើថា «ម៉ែគ្មានលុយនោះទេ កូនធំហើយគួរតែគិតរកការងារអ្វើធ្វើដើម្បីជួយសម្រាលបន្ទុកម៉ែ តែបែរជាមកសុំតែលុយដើរលេងស៊ីចាយជាមួយមិត្តភក្តិទៅវិញ» ។
ពេលគាត់និយាយចប់ ស្រាប់តែកូនប្រុសដែលជាជនសង្ស័យបានស្ទុះដេញវាយគាត់ ពេលនោះគាត់រត់រកអ្នកភូមិអោយជួយតែម្តង ។ ស្ត្រីជាម្តាយបន្តថាដោយខឹងអ្នកភូមិជួយគាត់ កូនប្រុសដែលជាជនសង្ស័យក៏ទៅវាយបំផ្លិចបំផ្លាញទ្រព្យសម្បត្តិក្នុងផ្ទះទៅវិញ។
ក្រោយពីសមត្ថកិច្ចឃាត់ខ្លួន និងធ្វើការសាកសួរ កូនប្រុសដែលជាជនសង្ស័យខាងលើបានឆ្លើយសារភាពថា ខ្លួនពិតជាបានគំរាម និងវាយបំផ្លិចបំផ្លាញទ្រព្យសម្បត្តិក្នុងផ្ទះពិតប្រាកដមែន។
បន្ទាប់ពីកសាងសំណុំរឿងរួចរាល់ សមត្ថកិច្ចស្រុកបានបញ្ជូនកូនប្រុសដែលជាជនសង្ស័យខាងលើទៅកាន់ការិយាល័យព្រហ្មទណ្ឌដើម្បីចាត់ការបន្ត៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]